Sultanov: “Neftçi”nin heç bir futbolçuya ehtiyacı yoxdu” - Mahmudov məşqə çıxdı və..
Son günlərin müzakirə mövzusu “Neftçi”di.
Az qala hər gün paytaxt klubu ilə bağlı yeni bir xəbər yayılır. İstər nəticələr, istərsə də son vaxtlar klub ətrafında müşahidə olunan ab-hava onu deməyə deməyə əsas verir ki, nəsə yolunda getmir.
Problem nədi? Futbolçuların bir neçəsinin müsahibələrindən belə nəticə çıxır ki, klub daxilində problemlər var. Miodriq Bojoviç isə hər mətbuat konfransında nəticələri fərqli səbəblərlə izah edir. Azarkeşlər sosial şəbəkələrdə rəhbərlikdən kəskin narazılığını gizlətmir. “Ağ-qaralar”ın aparıcı futbolçuları da tənqid olunur. Emin Mahmudovdan başlayaraq hər biri haqqında müxtəlif fərziyələr dolaşır. “Neftçi” üçün önəmli sima olan Mahmudov yeni baş məşqçi ilə sanki “dil tapa” bilmir. Deyilənlərə inansaq, Bojoviçin “qara siyahısı”na düşənlərdən biri də məhz Emindi.
Niyə kapitan?
Bir neçə turdu ki, Eminin adı iştirak ərizəsinə salınmır. Futbolçu 31-ci turun aprelin 20-də keçirilən “Zirə” ilə matçından sonra qeybə çəkilib. Onun yoxluğunun əsas səbəbi kimi aprelin 24-də keçirilən “Qarabağ”la kubok oyunundan əvvəl topuğundan zədə alması göstərilir. Eminin oyunöncəsi məşqdə zədə aldığı deyilsə də, klub bununla bağlı rəsmi məlumat açıqlamayıb. Eyni zamanda Mahmudovun məşqlərdə iştirakına dair də klub tərəfindən paylaşılan fotofakta rast gəlmədik.
Beləliklə, Eminin taleyi onun potensialına bələd olan hər kəsi narahat edir. Belə fikirlər var ki, mövsüm bitəndən sonra ya Miodraq Bojoviç göndəriləcək və biz əvvəlki Emini görə biləcəyik, ya da kapitan öz istəyi ilə klubdan uzaqlaşacaq. İstənilən halda, kapitan bu çətin günlərdə, avrokuboklara gedən yolda komandasının yaninda olmalıdı. Görünür, maneələr daha ciddidi.
Bəs “Neftçi” üçün önəmli olan Eminin belə duruma düşməsi nə ilə bağlı ola bilər? “Neftçi”nin sabiq idman direktoru Ceyhun Sultanovun fikirləri:
“Bojoviçin “qara siyahısına düşmək” deyiləndə, bu məşqçinin “Neftçi”də qalıb-qalmayacağı dəqiq bilinmir. Ki, o özü “Neftçi”yə nə qədər xeyir verib?! Həmçinin Eminin üçillik müqaviləsi var. Bu müqaviləyə xitam vermək üçün ona böyük məbləğdə pul ödənilməlidi. Fikirləşmək olar ki, bəlkə kapitan enişdə olduğu üçün ortaya belə söz-söhbət çıxıb. Bunu zaman göstərəcək. Əlbəttə, hər futbolçuya təklif gələ bilər. Emin azad agent statusuna malik deyil ki, təklifləri dəyərləndirsin. Onun sözləşməsində hansı bəndlərin olduğunu bilmirəm. Fikri getməkdisə, oynamaq istəmirsə, elə futbolçunu heç vaxt saxlamaq olmaz. Emin “Neftçi” üçün zamanında böyük işlər görüb. Kapitanın hazırda “ağ-qaralar”dan getmək istəməsi normaldı. “Neftçi”nin heç bir futbolçuya ehtiyacı yoxdu. “Neftçi” hər kəs üçün vacib olmalıdı, hər kəs onun üçün can qoymalıdı. Bu gün futbolda kimsə performansından aşağı səviyyədə çıxış edirsə, səbəblərini araşdırmaq lazımdı. Ümumi oyun üslubuna uyğun deyilsə, hə, o başqa məsələ. Belədə klub bu futbolçu ilə yolları ayıra bilər. Son mövsümə baxanda görürük ki, Emin əvvəlki formasından aşağı səviyyədə çıxış edir. Amma ayrı səbəbləri ola bilər. Bəlkə məşq prosesində problem var, bəlkə... Bəlkələr çoxdu. Bu üzdən dəqiq nəsə demək olmur. Amma bu gün futbolçunun başqa ölkədən təklifi varsa, onu dəyərləndirirsə, bu normal haldı. Düşünürəm ki, Avropanın aparıcı klublarından heç biri Mahmudova bu yaşda istədiyi pulu verməyəcək. Ona görə bir az güzəştə getməlidi. Ortaq məxrəc tapılmalı və ilk növbədə oyunçu ilə danışıq aparılmalıdı. Qəti şəkildə fikrindən dönməyəcəksə, əlbəttə, yolları ayırmaq daha məqsədəuyğundu”.
Biz Eminin durumu ilə bağlı “Neftçi”dən də cavab almağa çalışdıq. Klubun mətbuat xidmətinin əməkdaşı Xəyalə Şahlarlıya müraciət etdik. Onun sualımıza cavab belə oldu:
“Emin komanda ilə məşqlərə qoşulub. Dünənki məşqdən sonra təkrar ağrıları oldu. Bugünə maqnit-rezonans tomoqrafiyası təyin edilib. Həkimlər nəticəsinə baxacaq. Yəqin ondan sonra vəziyyətə uyğun qərar verilər”.
ROYANƏ OĞUZ
Digər xəbərlər
