Marko Roys “Borussiya” ilə müqavilə müddətini uzatmayacaq.

“Football-plus.az” xəbər verir ki, bu xəbər rəsmi şəkildə açıqlanıb. Dortmundda 12 il keçirən alman futbolçu komandanın əsl rəmzinə çevrilib – “Siqnal İduna Park”da yetişən ulduzlar top-klubların yolunu tutduğu halda, o nəsə qazanmaq ümidi ilə burda qalıb. Hazırda 34 yaşı olan Markonun titulları onun istedadına qətiyyən uyğun gəlmir – Almaniyanın iki kuboku və üç Superkuboku. Roysun karyerası birmənalı keçmədi: bir tərəfdən, getsəydi, daha artığına nail ola bilərdi, digər tərəfdən isə demək olar ki, bütün karyerasını bir komandada keçirməklə inanılmaz sadiqlik göstərdi. Bu da müasir futbol üçün qeyri-adi tendensiyadı.

Marko təkcə klubda faciəvi anlar yaşamayıb
23 yaşlı Roys “Borussiya”da keçirdiyi elə ilk mövsümdə (2012/13) az qala Çempionlar Liqasını qazanacaqdı. “Bavariya” Yürgen Kloppun çalışdırdığı komandanı finalda məğlub etdi (2:1). Markonun həmin oyunda qazandığı penaltini İlkay Gündoğan qola çevirdi. “Siqnal İduna Park”dakı elə ilk mövsümdə Çempionlar Liqasının finalında alınan məğlubiyyət Roysun bu klubdakı çoxsaylı məyusluqlarından biri və bəlkə də ən yüksək uğuru oldu. Hər halda, ÇL-in finalında oynamaq ölkə kubokunu iki, Superkubokunu üç dəfə qazanmaqdan daha nüfuzludu.
Müntəzəm üzləşdiyi kiçik zədələrə baxmayaraq, Rays sabit şəkildə top səviyyəsini göstərib. O, 2012/13 mövsümündə bütün turnirlərdə 19+16 göstəricisi ilə yadda qaldı, növbəti mövsüm 23 qol vurdu, 22 məhsuldar ötürmə verdi və məntiqlə DÇ-2014-də Almaniya yığmasının liderlərindən biri olmalıydı. Markın karyerasındakı daha bir faciə bu turnirlə bağlıdı – komandanın Braziliyaya yollanmasına bir gün qalmış Ermənistanla yoldaşlıq oyununda topuq bağlarını qırdı və bundestim üçün qələbə ilə bitən mundialı buraxdı. Ümumiyyətlə, yarımmüdafiəçinin yığma karyerası heç alınmadı: DÇ-2014-ün ardından zədə üzündən AÇ-2016-nı, AÇ-2020-ni, 2017-ci ildə keçirilən Konfederasiyalar Kubokunu və DÇ-2022-ni də buraxdı. Klubda da zaman-zaman zədə problemi yaşadı: məsələn, 2016/17 mövsümündə hədsiz az (bundesliqda cəmi 1189 dəqiqə) az oynadı, növbəti mövsümü isə xaçvari bağın qırılması üzündən praktiki cəhətdən tam buraxdı. Bu, Roysun karyerasındakı ən ciddi zədə idi. Buna qədər onu əsasən qısa müddətə yaşıl meydandan kənarda qoyan əzələ problemləri narahat edirdi. Xaçvari bağın qırılması futbolçunu psixoloji cəhətdən də çökürdü: cəmu 29 yaşında o artıq qocaldığını düşünməyə başladı, yorulduğunu etiraf etdi.

Potensialını tam aça bilmədiyinə görə özü günahkardı
Bununla belə, alman sabit şəkildə “Borussiya”nın heyətində ən məhsuldar futbolçulardan olub, böyük titulları qazanmağa iddialı klubların diqqətini sonsuza qədər cəlb edib. Cari və xaçvarı bağın qırıldığı mövsümləri nəzərə almasaq, Dortmundda keçirdiyi 12 ildən yalnız biri sönük alınıb. Marko ötən mövsüm bütün turnirlərdə keçirdiyi 1806 dəqiqə ərzində 16 məhsuldar hərəkətlə (8+8) yadda qalıb. Roysun istedadının ən böyük vurğunlarından biri üç il onu çalışdıran Klopp olub. Adı çəkilən mütəxəssis həmvətənini “Liverpul”a aparmağı arzulsa da, Marko başqaları ilə yanaşı, ona da “yox” cavabı verib. Almaniyanın məşhur “Bild” nəşri Roysun “Borussiya” naminə neçə klubun təklifini qəbul etmədiyini hesablayıb. 2012-ci ilin yayında həmin vaxt Münhenqladbax komandasının şərəfini qoruyan Marko “Bavariya”nın baş məşqçisi Yupp Haynkesi ziyarət edib. Məşhur mütəxəssis futbolçunu kofe, tort və “Alyans Arena”ya köçmək təklifi ilə qarşılayıb. Yarımmüdafiəçi həmin vaxt artıq Dortmunda köçməyə qərar vermişdi. PSJ Roysun arxasınca həm 2014-cü, həm də 2015-ci ildə yürüdü. Parislilərin ikinci təklifində ağlasığmaz 20 milyon avro maaş təklifi yer almışdı. Almaniyalı yüzdəyüz “Park de Prens”də bir neçə çempionluq qazanacaqdı. Elə həmin il Marko “Real”la “Barselona”dan da təklif aldı: madridlilərə “göy-qırmızılar”a simpatiyasına görə “yox” dedisə, kataloniyalılarla da ...“Borussiya”ya daha böyük sevgisi üzündən anlaşmadı. Marko 2015-ci ildə Dortmund klubu ilə müqavilə müddətini 2019-cu ilə qədər uzatdı. Hərçənd komanda həmin vaxt bundesliqada 16-cı yerdə sürünürdü, dərin böhran yaşayırdı. 2018-ci ilin əvvəlində Pep Qvardiola da almaniyalı ulduzun arxasınca düşdü. Bununla belə, ildə 23 milyon avro maaş təklif edən “Mançester Siti” də Roysu “Borussiya”dan daha artıq dərəcədə həyəcanlandıra bilmədi.

Maraqlıdı ki, bu klubların hər biri Roysa təklif göndərəndən sonra ölkə çempionluğunu və Çempionlar Liqasını (PSJ-dən başqa) qazanıb. Almaniyalı ulduz özü isə top səviyyəli bircə dənə də titul qazanmayıb. Belə görünür ki, yarımmüdafiəçi özü-özünü potensialını maksimal dərəcədə reallaşdırmaq imkanından məhrum etdi, rahat Dortmundda qalmaqla yeni səviyyəyə doğru addım atmaq istəmədi. Ona gerçək bir dahi olmaq yolunda təkcə zədələr yox, özünün qətiyyətsizliyi də mane oldu. “Borussiya” bu il hətta Çempionlar Liqasının qalibi olsa belə, bu, Markonun qələbəsi olmayacaq – o, pley-off mərhələsində yalnız PSV ilə ilk 1/8 final oyununda 15 dəqiqədən artıq meydanda görünüb (PSJ ilə oyundan əvvəl yazılıb – red.). İndi komandada ab-havanı başqaları müəyyənləşdirir.

Hər halda, Marko niyə dahidi?
Nəhənglərin transfer təklifləri Roysun gözünü qamaşdırmadı, bu üzdən top səviyyəli titullara həsrət qaldı. Ancaq bəlkə də onun böyüklüyü elə bundadı: şəxsi ambisiyaları daha ali dəyərlərə - sadiqliyə, azarkeş sevgisinə, kluba sevgisinə qurban verdi. Marko hər zədədən sonra sıraya qayıtdı, birlikdə komandanı güclü etdiyi oyundaşlarının ayrılmasına dözdü. Yarımmüdafiəçi Mario Götse, Robert Levandovski, İlkay Gündoğan, Mats Hummels, Ceydon Sanço, Pyer-Emerik Obameyanq və başqa ulduz oyundaşlarının satılmasını ağrı ilə qarşılasa da, əlindən nə gəlirdi ki?! “Siqnal İduna Park”da yalnız o özü və böyük qələbələrin yoxluğu dəyişməz qaldı.
Klopp hələ 2015-ci ildə belə demişdi:

Marko davranışı ilə Stiven Cerrardı, Françesko Tottini, Paolo Maldinini və bütün karyerasını bir kluba həsr edən başqa əfsanələri xatırladır. O, sadiqliyin şöhrətdən daha yüksək dəyərləndirildiyi “köhnə kişilərin futbolunun” son qəhrəmanlarından biridi. Əlbəttə, Roys böyük futbola Münhenqladbaxda qədəm qoyub, ancaq elə ilk imkandaca 6 yaşından məşğul olduğu “Borussiya”ya qayıdıb. Yarımmüdafiəçi bunun sayəsində Dortmund üçün əvəzolunmaz fiqura, kulta çevrilib və adını tarixə əbədi yazıb. Bəlkə də top-klublara mükafat dalıncaq qaçsaydı, irsi daha sısqa görünəcəkdi. Ancaq almanın karyerası yaddaşlara əbədi yazılacaq. Bəzən adamın Roysa yazığı gəlsə də, çoxları üçün o əsl idoldu.