“Trabzonspor”un sabiq başqanı Mehmet Əli Yılmaz dünən İstanbuldakı evində dünyasını dəyişib.

“Football-plus.az” xəbər verir ki, bu barədə həmin evə gələrkən onu ölmüş vəziyyətdə aşkarlayan qızı xəbər verib. İlkin incələmə zamanı onun ölümündə şübhəli bir məqama rast gəlinməyib. Onun 75 yaşı var idi.

“Trabzonspor”da üç fərqli dönəmdə - 1982-88, 1989-92 və 1997-00-ci illərdə başqan vəzifəsini icra edən Yılmaz bir dönəm Türkiyənin idman naziri kimi də çalışıb. Məhz onun nazir kimi çalışdığı dönəmdə Türkiyə Futbol Federasiyası müstəqil qurum kimi fəaliyyət göstərməyə başladı və eləcə də Türkiyə futboluna gəlirlərin ədalətli şəkildə bölüşdürülməsinə yardım edən “hovuz sistemi” gətirildi. Uzun illərdi “Trabzonspor”un bazası məhz Mehmet Əli Yılmazın adını daşıyır. Turizm sektorunda da çalışan Yılmaz 1996-cı ildə Antalyanın Kəmər bölgəsində “Ziqana İstirahət Mərkəzi” yaratmış, sonradan burda turistlər arasında böyük populyarlığa malik olan beşulduzlu “Club Ziqana Hotel” tikilmişdi. Yılmaz eyni zamanda internet üzərindən fəaliyyət göstərən “TV em”, eləcə də yalnız Trabzonda yayınlanan “Ziqana TV” və “Ziqana FM” kimi media qurumlarının sahibi idi.