Aprelin 17-də 1-ci liqanın 22-ci turu çərçivəsində “İrəvan” – “Şamaxı” oyunu (2:6) keçirildi.

Oyun ərzində xeyli diqqətçəkən məqam qeydə alındı. Məsələn, meydan sahiblərinin iştirak ərizəsinə nəzər salsaq, görərik ki, ehtiyat oyunçular skamyasında cəmi bir futbolçu var. O da qapıçı... Yəni Nazim Süleymanovun sərəncamında dəyişiklik üçün sahə oyunçusu yoxdu! Allah heç kimi sağlıq durumuyla sınamasın, amma hansısa futbolçu zədələnsə, baş məşqçi nə edəcək? Heyətin kasadlığının səbəbinə gəlincə, əksəriyyət bunu bir neçə oyunçunun danışılmış oyunlara görə komandadan uzaqlaşdırılmasıyla izah edir. Amma və lakin...

Deyəsən, “təmizlik” işləri diqqətli aparılmayıb. Çünki son oyunla bağlı da iddialar mövcuddu. Belə ki, izləyicilər “İrəvan”ın kapitanı Əli Əliyevin meydandakı davranışından narazıdı. Biz də bu oyunu araşdırdıq. Bəlli oldu ki, futbolçunun davranışı həqiqətən şübhə doğurur. Bizi belə düşünməyə vadar edən bəzi epizodları təsvir edək, qərarı isə öhdənizə buraxaq...

32-ci dəqiqə... Əli cərimə meydançası daxilində topa yox, birbaşa “Şamaxı”nın futbolçusuna kobud müdaxilə edərək yerə yıxır və komandasının qapısına penalti təyin edilir. Penalti qolla nəticələnir (1:2).
37-ci dəqiqə... Əli əlverişli mövqedə olan Qurban Səfərovun qarşısını rahatlıqla ala bilərdi. Lakin o, demək olar ki, hadisələrə şahidlik etməklə kifayətlənir (1:3).
57-ci dəqiqə... Top Əlinin gözləri önündə Elşad Tağıyevin qarşısına düşür və “şirlər”in üzvü komandasının növbəti qolunu vurur. Kapitan isə nəinki buna mane olur, hətta üz çevirir (1:4).
66-cı dəqiqə... Səbayıl Bağırov fərqi 4-ə çatdırır. Həmin epizodda Əli yaxınlıqda olsa da, irəli atılıb mane olmur (1:5).
77-ci dəqiqə... Əli “Şamaxı” futbolçusunun uzaqdan zərbəsini başla qəbul edərək ...rəqibə ötürmə verir. “Şirlər”in kapitanı “çərçivə”ni qeyri-dəqiq nişan alır.
78-ci dəqiqə... “İrəvan”ın qapıçısı zərbəni dəf etmək istəyərkən topa yiyələnə bilmir. Fürsətdən istifadə etmək istəyən rəqib irəli atılsa da, yaxınlıqda olan Əli hansısa reaksiya vermir.
81-ci dəqiqə... Əli cərimə meydançası daxilində növbəti dəfə kobud qayda pozuntusuna yol verir. Kapitanın səhvi üzündən təyin edilən penalti qolla nəticələnir (1:6).
90-cı dəqiqə... “Şamaxı” hücum edir. Rəqiblə bərabər irəliləyən Əli topu almaq əvəzinə onunla paralel irəliləməklə kifayətlənir.

Bunlar azarkeşlərin qəzəbinə səbəb olan epizodlardı. Əlbəttə, biz kimisə suçlamırıq, lakin meydanda yaşananlar şübhə doğurur. Bəlkə də artıq 32-ci dəqiqədə sarı vərəqə ilə cəzalanması kapitanın gözünü qorxutmuşdu. Əli toparlanmalı və daha diqqətli çıxış etməlidi. Əlbəttə, iddiallarla barışmırsa...

KƏNAN BAHADIR