"Yay "transfer pəncərəsi"ndə keçidi reallaşdırılan Ramil Şeydayev ən çox müzakirə edilən futbolçu oldu. "Tayland liqasından futbolçu alınarmı?" deyən azarkeşlər sosial mediada fırtına qopardı. Oyunçunun sabiq klubuna ödənilən məbləğ və maaşının miqdarı da yetərincə narazılıq yaratdı. Üstəlik ilk oyunlarda gözləntiləri doğrultmaması tənqidlərin dozasını artırdı. Əksəriyyət "parçası yaxşıdısa, şalvar düzəldək" deyib onu aşağıladı. Bilindiyi kimi, Ramil təqribən ayyarım idi meydana çıxmırdı. Bu üzdən özünü toparlaması zaman aldı. Futbolçu buna Azərbaycan millisinə dəvət ediləndən və iki oyunda 90 dəqiqə meydanda qalandan sonra nail oldu. Yəni həm fiziki, həm də psixoloji cəhətdən özünə gəldi.

Ramil "Göztəpə" ilə oyunda hadisələrin axarını dəyişən futbolçu oldu. "Kocalispor"un ilk iki qolunda pay sahibi oldu. Start heyətində meydana çıxan hücumçu çox güclü oynadı. Bundan sonra çoxu "yanılmışıq, adam çox yaxşı oynayır" deməyə başladı. Şeydayevin mövsümün son oyunlarında komandasına çox kömək edəcəyi bəllidi. O, fiziki cəhətdən çox güclüdü. Azərbaycan premyer-liqasında bombardir olması da göstərir ki, bitirici zərbələrdə dəqiqdi.

Bildiyimə görə, Ərtoğrul Sağlam futbolçunun "Kocaelispor"a transfer edilməsi üçün çox israr etmişdi. Mütəxəssisin niyə belə davrandığı bəlli olur. Məncə, Ramil aldığı maaşa layiqdi. Onun komandaya gətirilməsində əməyi olan hər kəsi təbrik edirəm. Mövsümün sonunda Türkiyədən və başqa ölkələrdən təkliflər alsa, təəccüblənmərəm".