Dünən 1-ci liqada 20-ci turun sonuncu oyununda MOİK “Şamaxı”nı qəbul etdi.

“Şamaxı” qələbə qazandı (1:0), “hərbçilər” isə bu məğlubiyyət üzündən 4-cü pilləyə endi. MOİK-in baş məşqçisi Qəzənfər Abbasovla əlaqə saxlayıb, həm bu oyun, həm də başqa məsələlər ətrafında danışdıq.

- Komandanız bu gün “Şamaxı”ya məğlub oldu. Qələbə üçün nə çatmırdı?
- Bir qədər şanssızlıq oldu. Qol imkanlarımız rəqiblə müqayisədə çox idi. Elə epizodlar vardı ki, futbolçularım tələsdi, bəzən də top qapıdan yan keçdi. İkinci hissə, demək olar, üstünlüyümüzlə davam etdi. Sadəcə, mənə təsir edən məğlubiyyətdən çox rəqib komandanın 1-ci hissədə qol vurandan sonra oyunun tempini aşağı salması idi. Futbolçular vaxtaşırı yerə otururdu, biri ayağını, biri başını tutaraq tempi aşağı salmağa çalışırdı. Biz 1-ci liqada yuxarıda qərarlaşan, bərabərsəviyyəli komandalarıq. “Şamaxı”nın futbolçularının belə hərəkəti futbola yaraşmır. Biz istəyirik sürət artsın, inkişaf olsun, 1-ci liqa ilə premyer-liqanın səviyyəsi yaxınlaşsın. Amma belə hərəkətlə çətin inkişafdan söz getsin. Sonda belə hərəkətlər anlaşılandı. Sadəcə, 2-ci hissədə tam belə oynamaq düzgün deyildi. “Şamaxı” sonda qərarlaşsaydı, xal uğrunda mübarizə anlaşılan idi. Mən şəxsən “Şamaxı”nın belə futbol oynamasına təəssüflənirəm.

- Xal hesabınız “Şamaxı”yla eynidi. Üstəlik yuxarı pillərdə xal fərqi azdı. Bununla da növbəti turlarda mübarizənin əvvəlkindən çətin olacağını düşünürsüz?
- Hər oyuna qələbə üçün çıxırıq. Bu gün məğlub olmağımız nəyisə dəyişmir. Növbəti turlarda çalışacağıq ki, qələbə qazanaq. Hədəfimiz çempion olmaqdı.

- İstədiyiniz komandanı qura bilibsiz? 
- Bəli. MOİK istənilən komandanı uda biləcək potensialdadı. Düzdü,  bəzi futbolçuları qışda transfer etmək istədik, alınmadı. Amma istədiyimiz komandanı qura bildik. Hazırda çempionatda layiqincə mübarizə apara biləcək komandam var. Bilirəm ki, bu heyətlə irəli gedəcəyik. Qarşıda 7 tur var və inanıram ki istəyimizə çata biləcəyik.

- Premyer-liqada iştirak etməyə hazırlaşırsız? Bunun üçün hazırlıq görülür?
- Hazırda hədəfimiz 1-ci liqada çempion olmaqdı. Bundan sonra premyer-liqada çıxış etmək qismət olacaqsa, edəcəyik. Öz gücümüzlə, oyunçuların alın təriylə bu yerə gəlmişik.

- Ehtimallar təsdiqini tapsa, çempionatda komanda sayı 12-yə çatdırılacaq.
- Premyer-liqada 12 komanda yaxşı olardı. Şərt deyil ki, biz olaq, ya olmayaq. Bu həm  çempionatın maraqlı keçməsi, həm də kənarda qalan futbolçuların iştirakı baxımından müsbət hal olar. Elə futbolçular var ki, bu dəqiqə premyer-liqada oynamaq potensialındadı, amma klub azlığından 1-ci liqada vaxt itirir. Mən bu qərarı yalnız alqışlayaram.

- Növbəti mövsüm stadionla bağlı yenilik olacaq?
- Bəli, fikrimiz var. Binədə oynamağa heç mövsümün əvvəlindən razı deyildim. Süni ot örtüklü meydançanın bərbad vəziyyətdə olması futbolçularım üçün də çətindi. Məşqin hər dəqiqəsi zədə ola bilərdi. Başqa stadion olmadığından, məcburiyyətdən burdayıq. Gələn il stadionun ot örtüyü dəyişsə, 1-ci liqada qalsaq, Binədə oynayacağıq. Yox dəyişməsə və ya premyer-liqaya çıxsaq, təbii ot örtüyü olan meydança tapmalıq. Təbii ki, yüksək liqada oynayacağıqsa, burda bütün infrastruktur dəyişməlidi. Hələ çempion olaq, sonrasına baxarıq.

RÖYANƏ OĞUZ