Misli premyer-liqasında mövsümün başa çatmasına cəmi 8 tur qalıb.

Gərgin mübarizə fonunda kimin autsayder olduğu məlumdu.

Bəzən belə ehtimallar da səslənir ki, AFFA İcraiyyə Komitəsinin mayın əvvəlində keçiriləcək iclasında növbəti “futbol ili”ndən çempionat iştirakçılarının sayı 12-yə çatdırılacaq. Bu halda sual yaranır: sonuncu yeri tutan klub elitanı tərk etməyəcək? Və ya 1-ci liqa təmsilçiləri üçün əlavə şans olacaq? Bu və başqa suallarla AFFA-nın Lisenziyalaşdırma Qrupunun rəhbəri Elçin Məmmədova müraciət etdik.

- Növbəti mövsüm Misli premyer-liqasında iştirak etmək üçün müraciət edən 1-ci liqa klublari varmı? Varsa, hansılardı?
- Bəli, bu məqsədlə bir neçə klubdan müraciət almışıq. Hələ ki adlarını açıqlaya bilməyəcəyik. Çox güman, bu barədə yekun qərar mövsüm bitəndən dərhal sonra elan olunacaq. UEFA mayın 15-nə qədər həm kişi, həm də qadın futbolu haqda qərarları təsdiqləyəcək. Çünki bu ildən etibarən yüksək liqamızın qalibi də ölkəmizi qadınlar arasında keçirilən Çempionlar Liqasında təmsil edəcək.

- Hazırda xüsusilə “Qəbələ”nin premyer-liqada qalıb-qalmayacağı müzakirə olunur. İnfrastruktur amilini nəzərə alsaq, “qırmızı-qaralar”ın çempionatda iştirakının davam etdirməsi mümkündü?
- Düzdü, stadion tələblərə cavab vermək baxımından beş vacib meyardan biridi. Bundan başqa, kadrlar, hüquq, maliyyə və s. kimi amillər var. Lakin PFL-in Əsasnaməsinə görə, mövsümü sonuncu pillədə bitirən komandanı 1-ci liqada çempion olan və lisenziya əldə edə bilən klub əvəzləməlidi. Əlbəttə, tələblərə cavab verməyən kluba lisenziya verilmir. O başqa məsələ ki, İcraiyyə Komitəsi AFFA-nın ali orqanıdı və PFL-lə birlikdə formatı dəyişə bilərlər. Buna ixtiyarları var.

- Bəs komanda sayı 12-yə çatdırılsa və ya formatda fərqli dəyişikliklər edilsə, tələblər dəyişə bilər?
- UEFA-nın bu yöndə müəyyən qərarları var və biz də yoxlamaları həmin tələblərə uyğun aparırıq. Premyer-liqa və 1-ci liqa iştirakçıları üçün ilkin təbləblər isə PFL-dən asılıdı. Biz klubların siyahısını tərtib etdikdən sonra bir çox məqamı PFL-lə dəqiqləşdiririk. Klubun sifariş etdiyi stadion bu qurumu qane edirsə, növbəti mərhələdə tələbin qarşılanıb-qarşılanmadığı yönündə rəy veririk.

- Və sonda: 2024/25 mövsümü üçün lisenziya şərtlərinin sərtləşməsi, yoxsa yüngülləşməsi mümkündü?
– Növbəti “futbol ili” üçün qaydalar hazır deyil. Çünki UEFA müəyyən dəyişikliklər planlaşdırır. Bu üzdən mövsümün sonunu gözləyirik. Daha sonra ali futbol qurumundan təlimatları alıb hansı qaydaların dəyişdiyini dəqiqləşdirəcəyik. Bununla yanaşı, həm klublarda, həm də özümüzdə maraq doğuran sualları qeyd edirik. Vaxtı gələndə İcraiyyə Komitəsinə dəyişikliklərə uyğun olan təkliflərimizi edəcəyik. Bir sözlə, yenilənmələr UEFA-nın tələblərinə uyğun olacaq.

RÖYANƏ OĞUZ