Britaniyalı ultramarafonçu Rass Kuk indiyə qədər heç kimin edə bilmədiyi inanılmaz bir rekordun müəllifi olub.

Belə ki, o bütün Afrika qitəsini bir başından o biri başına qədər qaçıb! Kuk öz qaçışına qitənin ən cənub nöqtəsi olan Aqulyasdan start verib. Bu tarixi marafonun sonu isə Afrika qitəsinin ən şimal nöqtəsi sayılan Tunisin Bizerta şəhərinə təsadüf edib. ''Ginnesin Rekordlar Kitabı''na düşən bu qaçış zamanı Kuk 16294 km qət edib ki, bu da təxminən 386 marafon məsafəsinə bərabərdi! O, əvvəlcə bu layihəni 240 günə bitirməyi planlaşdırırdı. Amma nəticədə nə az, nə çox - düz 352 gün qaçmalı oldu. Qaçış zamanı Kukun başına bir sıra olaylar da gəlib.

Məsələn, Anqolada o, soyğuna məruz qalıbsa, Nigeriyada zəhərləndiyi üçün bir müddət müalicə almalı olub. Bundan başqa Əlcəzair və Mavritaniya sərhədlərində viza ilə bağlı problemlər yaşayıb. Kuk buna aid öz səhifəsində ''missiya yerinə yetirildi'' adlı paylaşım edib. Bütün dünyanın marağına səbəb olan bu layihə sayəsində Kuk 750 min dollar toplaya bilib və bu pulu xeyriyyə məqsədi ilə xərcləyəcək.

ƏLİ