Futbol üzrə ölkə çempionatının 1-ci liqasında 20-ci tur başa çatdı.

Cari mövsümün sonunda liqanı tərk etmək təhlükəsiylə üzləşən “Araz Saatlı” ardıcıl ikinci qələbəni qazanaraq 9-cu sıradakı “Difai Ağsu” ilə aradakı xal fərqini 3-ə endirdi. Bölgə təmsilçisi “İrəvan”ı darmadağın etdi. Oyundan sonra komandanın baş məşqçisi Rüfət Quliyevlə söhbətləşdik.

Mütəxəssis əvvəl oyun haqda fikirlərini bölüşdü.

– Ardıcıl ikinci matç idi eyni taktika ilə oynayırdıq. Məqsədimiz ələ düşən fürsətlərdən yararlanmaq idi. Planımız alındı, qələbə qazandıq. Futbolçularımı təbrik edirəm. Bu, onların əziyyətinin bəhrəsidi. Hər iki görüşdə üzərlərinə düşən işin öhdəsindən gəldilər.

- Həmişə komandanın bu vəziyyətdən çıxacağına inandığınızı söyləyirdiz. Demək olarmı ki, artıq öz oyununuzu tapmısız?
- Qışdan sonra ilk iki-üç qarşılaşmada istədiyimiz oyun və nəticəsini əldə edə bilmədik. Həqiqətən üzücü durum idi. Amma hardasa sizinlə razılaşmaq olar. Bəli, öz taktikamızı tapmışıq. Sxemlərdə də bəzi dəyişikliklər etmişik. Nəticədə istənilən əldə olunub. Qarşıda bizi əsas rəqibimiz “Difai Ağsu” ilə oyun gözləyir. Onlar da bu gün xal itirdi. Bu rəqibi məğlub etsək, xallar bərabərləşəcək. Lakin bununla hər şey həll olunmur. Qarşıda finala bərabər 7 oyun var. Son iki tur göstərdi ki, hər şey mümkündü. Sadəcə, mübarizə aparmaq lazımdı.

- Matçın sonlarında meydana iki yeniyetmə futbolçu buraxdız. Söhbət Ülvi Əvəzovla Hazar Əmirovdan gedir. Onlar barədə nə deyə bilərsiz?
- Onların hər ikisi Saatlı futbol məktəbinin yetirməsidi. Ülvi 2009-cu ildə dünyaya göz açıb. Onu qış təlim-məşq toplanışında yoxlanışa gələn futbolçular arasından seçmişik. Klub rəhbərliyinə şəxsən bildirdim ki, onu komandaya cəlb etmək lazımdı. Həmişə deyirəm ki, Ülviyə bacardığım qədər şans verəcəm. Son iki oyunda onu meydana buraxırıq. Mövsümün əvvəlindən bəri qarşıya qoyulan məqsəd Azərbaycan futboluna töhfə verməkdi. Ümid edirik ki, gələcəkdə onun ölkə futboluna böyük xidmətləri olacaq. Ülviylə U-15 liqasından maraqlanan klublar da var. Hazar isə 2007-ci ildə anadan olub. O, futboldan uzaqlaşmışdı. Lakin belə istedadın itib-batmasına imkan verə bilməzdik.

- Demək olar ki, Ülvi bu mövsüm “Araz Saatlı”nın əsas tapıntısıdı?
- Əlbəttə. Plan futbolçu yetişdirib premyer-liqa klublarına göndərməkdi. “Araz Saatlı” olaraq, növbəti mövsümlərdə də bunu etməyə çalışacağıq.

İSMAYIL XEYRULLAYEV