İşçi qrupun İcraiyyə Komitəsinə təqdim edəcəyi siyahıda kimlər olacaq? – Vaqif Sadıqov belə dedi
AFFA-nın yeni prezidenti Rövşən Nəcəf Hesabat-Seçki konfransından sonra jurnalistlərin suuallarını cavablayarkən millinin baş məşqçisiylə bağlı məsələyə də toxundu.
O, işlərin artıq yekunlaşmaq üzrə olduğunu bildirdi:
“Bununla bağlı AFFA-da ötən ilin sonunda yaradılan İşçi qrup var. Həmin komissiya qısa siyahı hazırlayıb, məşqçilərlə danışıqlar aparılıb. İcraiyyə Komitəsi bu məsələni rəsmiləşdirəcək. Növbəti iclaslarda bu mövzu müzakirəyə çıxarılacaq”.
Bəlli olur ki, İşçi qrup öhdəliyini yerinə yetirib və işlər tamamlanıb. Bundan əvvəl onların iki iclas keçirdiyini və müəyyən məsələlərin müzakirə olunduğunu xəbər vermişdik. Sonra başverənlər haqda ətraflı məlumat almaq məqsədilə İşçi qrupun üzvlərindən biri, Məşqçilər Komitəsinin sədri Vaqif Sadıqovla əlaqə saxladıq. Onun “Football-plus.az”a söylədikləri:
“Başqa iclasımız olmayıb. İlk toplantılarda yeni baş məşqçinin profili və vacib meyarları müəyyənləşdirilib. Bundan sonra qərara alındı ki, uyğun yerli və əcnəbi məşqçilərin siyahısı tərtib olunsu və İcraiyyə Komitəsinə verilsin. Növbəti məsələlər məhz onlardan asılıdı. Siyahıda kimlərin olacağını açıqlamaq doğru olmaz. Yığmamıza və yeni baş məşçqiyə indidən uğurlar arzulayıram”.
Bəs mövzunun müzakirə edilməsi üçün mütəxəssislər cəlb olunacaqdı? Təcrübəli futbol adamlarının fikirləri öyrəniləcəkdi? Növbəti iclaslarda mövzu daha ətraflı araşdırılacaqdı? Görünür, AFFA-da yenə aparıcı bir neçə şəxsin sözü keçib...
KƏNAN BAHADIR
Digər xəbərlər
