"Qarabağ"ın asanlıqla çempion olduğunu gördük. Bunu meydandakı oyuna əsasən demək mümkündü. Amma hər şey məhz oyunöncəsi hazırlıq prosesindən asılıdı. Onlar hər matça ciddi məsuliyyətlə, fiziki və psixoloji cəhətdən tam güclə hazırlaşır. Nəticədə meydanda çətinlik olmur. Qutban Qurbanov və köməkçiləri bundan sonra da çətinlik çəkməyəcək. "Qarabağ"a motivasiya verən ən birinci məqam Avropa meydanlarında qazanılan uğurlardı. Beynəlxalq oyunlarda müntəzəm çıxış edən oyunçular çempionat matçlarında çətinliyin öhdəsindən gəlməyin yollarını tapır. Bu, təkcə Azərbaycanda yox, bütün ölkələrdə belədi. Baxmayaraq ki, "Qarabağ" indiyə qədər xeyli uğur qazanıb. Bundan sonra da böyük işlər görülməlidi. Cari mövsüm Toral Bayramov, Bəhlul Mustafazadə və Elvin Cəfərquliyev kimi yerli futbolçuların inkişafına səbəb oldu. Nəriman Axundzadə isə yolun başındadı. Hələ üzərində çox işləməlidi. Sadaladığım ilk üç futbolçunu daha güclü çempionatlarda görmək istərdim. "Qarabağ" qalan 8 matçdan Çempionlar Liqasının oyunlarına hazırlaşmaq üçün istifadə edəcək. Buna görə oyunlara ciddi yanaşmamaq, arxayınlaşmaq kimi halların şahidi olacağımıza inanmıram. Məşqçilər korpusu da buna imkan verməz. Hələ qarşıda kubok matçları da var. Odu ki, "Qarabağ" dayanmayacaq".

"Bütün işlərlə yanaşı, növbəti mövsüm üçün heyətlə bağlı islahatlar aparılmalıdı. Məsələn, Portuqaliya liqalarındakı klublar əsasən futbolçu yetişdirib satmaqla inkişaf edir. "Qarabağ" da bu yolla irəliləyə bilər. Hiss edirəm ki, azı 2-3 futbolçu daha güclü liqalara üz tutacaq və Ağdam təmsilçisi bu yolla yaxşı gəlir əldə edəcək. Komandadan ayrılacaq futbolçuların yerinin boş qalmaması üçün indidən işlər görülməlidi".