Ölkə kubokunun yarımfinal mərhələsinin ilk oyununda “Qarabağ” “Neftçi”ni məğlub edib - 4:0.

“Football-plus.az” xəbər verir ki, matçdan sonra bakılıların baş məşqçisi Miodraq Bojoviçin mətbuat konfransı keçirilib. Sizi onun fikirləri ilə tanış edirik:

- Müqavilə imzaladığınız vaxtda qarşınıza ikinci yer və ölkə kubokunu qazanmaq məqsədi qoyulmuşdu. Necə olacaq? Komandanın oyununda irəliləyiş yoxdu, azarkeşlər də matçınızı boykot edib...
- Niyə belə həyəcanlısız? Bundan məmnunsuz? Sanki uduzduğumuza görə məmnunsuz. Bizim məğlubiyyətimizə görə həyatınızda heç nə dəyişməyəcək. Komandaya rəhbərlik edən şəxslər var. Onlar qərar verəcək. İndi ikinci pillədəyik. Son üç oyunda 7 xal qazanmışıq. Bəli, bu gün uduzduq. Amma heç nə deyə bilmərəm.

- "Neftçi" evdə oynasa da, sanki "Qarabağ" ev görüşünə çıxmışdı. Bu vəziyyətə görə özünüzü nə dərəcədə günahkar hesab edirsiz?
- Burda iki ay yarımdı ki, fəaliyyət göstərirəm. Azarkeşlərlə hansı problem olduğunu bilmirəm. Bu sual mənə deyil. Azarkeşlər olduğu halda, komanda daha yaxşı, rahat oynaya bilərdi. Fakt odu ki, biz özümüzü sanki "Qarabağ"ın stadionunda hiss edirdik.

- Çemodanınız hazırdı?
- Sizin üçün nə fərqi? Bununla sizin həyatınızda nə dəyişəcək? Mənim öz həyatım var. Rəhbərlik qərar versə, məni işdən çıxaracaq. Siz isə, eyni şəkildə kiçik jurnalist kimi qalacaqsız.

- Emin Mahmudovun start heyətində yer almaması nə ilə əlaqədar idi?
- Emində zədə var idi. Risk etmək istəmirdik. İstər-istəməz çempionat bizim üçün çox önəmlidi. Onu "Sumqayıt"la oyun üçün saxlamaq istəyirdik. Fikirləşirdik ki, böyük mübarizə olacaq.

- Təsəvvür edək ki, yeni mövsümdən "Neftçi"nin baş məşqçisiz. Nələr edilməlidi ki, "Qarabağ"la bu qədər səviyyə fərqi görünməsin?
- Mövsümöncəsi yaxşı hazırlaşmaq önəmlidi. Komandanı gücləndirmək lazımdı. "Qarabağ"la mübarizə aparmaq çətindi. "Neftçi"nin uğurları olacaq. Amma bilmirəm mənimlə olacaq, ya yox. "Neftçi" əvvəl kimi güclü olacaq. İnanıram.