“Sona qədər narahatlıq içində idik“
Misli premyer-liqasının 20-ci turunda “Neftçi” “Qəbələ”ni məğlub edib - 3:1.
“Football-plus.az” xəbər verir ki, oyundan sonra “ağ-qaralar”ın baş məşqçisi Miodraq Bojoviçin mətbuat konfransı keçirilib. Sizi onun fikirləri ilə tanış edirik:
“Oyun gözlədiyimiz kimi ağır keçdi. "Qəbələ" xoşagəlməz vəziyyətdədi. Buna görə də onlar birinci hissədə müdafiədə yaxşı oynadılar. Həm rəqibin, həm də bizim qol vurmaq üçün imkanlarımız var idi. Məncə, yaxşı oyun keçdi. İkinci hissədə bir qol vurduq. Rəqib azlıqda qaldı, ardınca ikinci qol da gəldi. Düşünürdük ki, bu qollardan sonra oyunumuz daha rahat keçəcək. Amma əksi oldu. Nəticədə rəqibə qol vurmağa imkan yaratdıq. Sona qədər narahatlıq içində idik. Amma ən əsası qələbə qazandıq və 3 xalı əldə etdik”.
- Azər Salahlı ilk hissədə səhvlərlə yadda qaldı. Eyni mövqedə oynayan Azər Əliyev də tez-tez zədələnir. Bu mövqedə olan problemi necə aradan qaldıracaqsız?
- Sizinlə razı deyiləm. Azər Salahlı pis oynamadı. Bu, onun mövqeyi deyil. Azər Əliyev zədəlidi deyə Salahlını həmin mövqedə istifadə edirik. Əliyev artıq zədəsini sağaldıb və bu mövqedə rəqabət olacaq. Düşünmürəm ki, hər hansı yeni oyunçu komandaya cəlb olunacaq.
- Sol cinahda Lebon, Mirzov və Konte kimi oyunçular var. Sağ cinah isə Rəhmanın ümidinə qalıb. Bu mövqe ilə bağlı nə düşünürsüz?
- Konte sağ cinahda oynayır. Sadəcə bu gün belə əvəzetmə etdik.
- Oyun planında müsbət və sizi narahat edən məqamlar hansılardı?
- Bu komandanın keyfiyyəti var. Biz hazırda bir az səbr etməliyik. 24-cü gündü ki, işə başlamışıq. Bir az səbr edib keyfiyyəti artırmaq mümkündü.
- Sıx qrafikə qədəm qoyursuz. 10 gündə "Sumqayıt"la üç dəfə qarşılaşacaqsız. Eyni rəqiblə qısa müddətdə tez-tez üz-üzə gəlmək necədi?
- Bu, bizim işimizdi. Burda olan hər kəs peşəkardı. Əlbəttə ki, eyni komanda ilə ard-arda üç dəfə oynamaq asan deyil. Amma biz peşəkarıq, işimizi icra edəcəyik.
- Komanda uzun ötürmələrə daha çox bel bağlayır. Bu, rəqibə uyğun olaraq qurulan sistemdi?
- Oyunda dərinliyi axtarmağa çalışırıq. Geriyə pas atdıqdan sonra sürətli cinah oyunçularını hücuma cəlb etmək istəyirik. Ona görə də belə uzun ötürmələr olur.
- Qarşınıza premyer-liqada ikinci olmaq və kuboku qazanmaq məqsədi qoyulub. Bu məqsədə çatacağınıza əminsiz?
- Məncə, komanda keyfiyyətinə görə buna qadirdi. Bu tapşırığı icra etməyə çalışacağıq. Vaxt məhdudiyyəti var. Vaxtımız kifayət qədər olsa, buna nail olmaq mümkündü. Yerinə yetirə bilməsək, baxarıq görək nələr baş verəcək.
