«Söhbət Azərbaycan futbol camiəsindən, ailəsindən gedirsə, burda kiminsə yaxasını kənara çəkməsi düzgün deyil. Təbii ki, hər kəsin müəyyən məsuliyyət payı var. Ən böyük məsuliyyət isə istər-istəməz ölkədə futbola cavabdehlik daşıyan, bu idman növünün idarə olunmasında, inkişafında bilavasitə rol oynayan AFFA-nın üzərinə düşür. Ancaq «yalnız AFFA günahkardı» demək də ədalətli yanaşma deyil. Çünki, AFFA futbolçu yetişdirən qurum deyil. AFFA-nın birbaşa borcu yığma komandanın oyunlarının, səfərlərinin, toplanışlarının təşkil edilməsidi. Yığmaya futbolçu hardan gəlir? Əsas mövzu budu və bunun üzərində baş sındırmaq lazımdı. Əslində heç baş sındırmağa da ehtiyac yoxdu. Təkcə əsas yığmaya yox, bütün yaş qrupu üzrə yığma komandalara futbolçular klublardan gəlir. Klublardan gələn futbolçuların səviyyəsi də hamıya bəllidi. Böyük təəssüf hissiylə bildirmək istəyirəm ki, klublarımız hələ də səviyyəli futbolçu yetişdirmək işinin öhdəsindən gələ bilmir. Bu işi bacarsaydılar, təbii ki, biz daha böyük hədəflər uğrunda mübarizə aparar, bu haqda danışardıq. Doğrusu, Millətlər Liqasından Avropa çempionatının final mərhələsinə vəsiqə qazanmaq elə də çətin vəzifə olmamalı idi. Millətlər Liqasının UEFA tərəfindən  yaradılması ilk növbədə bizim kimi kiçik komandaların hədəfə çatması üçün hesablanmış və atılmış bir addımdı. Ona görə də düşünürəm ki, məsuliyyət payından danışırıqsa, hardasa 60 faiz AFFA-nın üzərinə düşür. Çünki ölkədə indiyə kimi sistemli futbol təsərrüfatının qurulmamasında sözügedən qurumun günahı var. Yəni illərlə lazımsız xərclər, layihələr olub, amma özünü doğrultmayıb. Lakin sırf yığmanın meydanda nəticə qazana bilməməsində klubların da 40-45 faiz məsuliyyət payının, günahının olduğunu düşünürəm. Ona görə ki, Azərbaycanın başqa ölkələrdə, güclü çempionatlarda oynayacaq futbolçusu yox səviyyəsindədi. Ölkə xaricində çıxş edən legionerlərimizə baxaq, harda oynayırlar və necə şans qazanırlar. Əksəriyyəti 10-15 dəqiqə oynayır, ümumiyyətlə, meydana çıxmayanlar da var. Belə şəraitdə isə milli komandanın Avropa çempionatına vəsiqə qazanmasını gözləmək, arzulamaq, mənə elə gəlir ki, qeyri-mümkündü. Hələ ki bu, sadəcə, xam bir xəyaldı. Gələcəkdə necə olacağını artıq zaman göstərəcək. Çünki AFFA-da dəyişikliklər olacaq. Yəqin ki, futbol təsərrüfatında da dəyişikliklər fonunda müəyyən yeniliklər gözləməyə dəyər. İndiki durumda yaxın zamanda bu məsələylə bağlı müsbət bir şey olacağına inanmıram. Çünki hazırki nəsil də göz qabağındadı. Elə U-21-in çıxışını nümunə göstərmək olar. Komanda yer aldığı qrupda sonuncu pillədədi və evdə keçirdiyi görüşlərdə də böyük hesabla uduzur. Sabah da həmin gənclər əsas millidə yer alacaqlar və onlardan ciddi nəsə gözləmək mümkünsüzdü».

«Gürcüstan millisini Avropa çempionatının final mərhələsinə aparan oyunu izlədim. Həm oyun, həm də tribunadakı coşqu möhtəşəm idi. Belə həlledici qarşılaşmalarda azarkeşlərin dəstəyi lazımdı və demək olar ki, onlar da bu dəstəyi sevimli komandalarından əsirgəmədilər. Gürcüstan yığması, səhv etmirəmsə, ötən dəfə də Avropa çempionatının final mərhələsinə vəsiqə qazanmaq üzrə olarkən Şimali Makedoniyaya məğlub olub turnirdən kənarda qaldı. Amma bu dəfə Yunanıstana qarşı oynadılar və böyük əzmkarlıq, şücaət göstərib qələbə qazandılar. Onlara uğur arzulayıram. Məndə olan məlumatlara görə, ümumiyyətlə, Gürcüstanda 17-18 yaşlı uşaqlar legioner həyatı yaşamadıqda artıq onların yaxşı oyunçu olmadığı düşünülür. Bu üzdən də onlarda bir düşüncə var ki, yalnız xaricə gedib orda özümüzü yaxşı tərəfdən göstərək. Elə Gürcüstanın ehtiyatda olan futbolçularına baxanda, demək olar ki, hamısı yaxşı klublarda oynayır. İtaliya, İngiltərə, İspaniya çempionatlarında çıxış edən futbolçulardı ki, təcrübələrini artırıb milli komandalarına kömək oldular. Yığmanın heyətində Gürcüstan çempionatında çıxış edən futbolçuları barmaqla saymaq olar. Qalanı legioner həyatı yaşayır, hətta bəziləri «böyük beşlik» ölkələrin klublarında mübarizə aparır. Buna görə də həmin futbolçuların yığma komandaya çox xeyri dəyir. Yunanlarla qarşılaşmada heç də rəqibdən geri qalmırdılar, hətta əksinə, bəzi qol vəziyyətləri yaratdılar, yaxşı mübarizə apardılar və layiqincə qələbə qazandılar. AÇ-2024-də onlara uğurlar diləyək. Bizdə nəyin çatıb-çatmamasına gəlincə, bir qədər əvvəl dedim: Gürcüstan futbolçuları legioner həyatı yaşayır, bizimkilər yox. Bax, bizdə bu çatışmır. Azərbaycanda futbolçu qıtlığı var. Hətta keyfiyyətli yerli oyunçu çatışmazlığı yaşanır. Bizim milli komandaya namizəd kimi göstərmək üçün 100-200 oyunçumuz yoxdu ki, onların arasından seçim edək. Ancaq Gürcüstanda elə futbolçular var ki, onların arasından seçim edib, ən yaxşıları yığmaya dəvət edirlər. Belədə həmin oyunçuların üzərində də oyunu qurub, qələbə qazanırlar. Federasiyaya gəlincə, geyim-keçimdi, mükafatdı, günlük puldu — bu baxımdan AFFA tərəfindən yığmamıza bütün şərait yaradılıb. Hətta başqa ölkələrdən də yaxşı səviyyədədi. AFFA həmişə milliyə dəstək verib. Problem odu ki, bizdə oyunçu çatışmazlığı var. Bilirsiz ki, seçim məhdud olanda istər-istəməz səviyyəsi aşağı olan futbolçunu da çağırırsan. Milli komandaya namizəd 20-25 oyunçu var, sadəcə, onlardan istifadə edə bilirik. Doğrudu, gənclərimiz var. Amma həmin gənclərlə meydana çıxıb məğlub olsan, həm komandanı, həm də baş məşqçini danlayırlar. Ona görə də milli komandaya hansısa baş məqşçi gələndə yaxşı nəticə əldə etməyə çalışır. Nəticə əldə etməkdən ötrü yaxşı futbolçular da lazımdı. Ona görə də bu baxımdan bizdə xeyli çatışmazlıq var. Hazırda legioner həyatı yaşayan oyunçumuz çoxdu. Lakin harda və ya hansı klubda çıxış etdiklərinə baxanda aradakı fərqi aşkar görmək olur. Hesab edirəm ki, futbolçularımız xaricdə yaxşı klublarda oynasalar, start heyətində yerlərini təmin etsələr, inkişafa nail ola bilərik. Əlbəttə, istəyərdik ki, futbolçularımız yaxşı klublarda çıxış etsinlər. Təəssüf ki, indi bu gözlənti doğrulmur. Bu məsələlər həll olunandan sonra milli komandamız da düzələcək. İndi çox adam deyir ki, futbolçularımız var, sadəcə, onları üzə çıxarmaq lazımdı. Hansı oyunçu varsa, üzə çıxarsınlar. Hələ ki belələrini görmürəm. Adicə U-21 yığmamızda bir-iki oyunçunu çıxmaq şərti ilə qalanları nə dərəcədə yaxşı oyun sərgiləyir? Gənclər inkişaf etsələr, milli komandamızda da hər şey yaxşı olacaq».