Hakimlik hələ də dünya futbolunda əsas problemlərdən biri kimi qalır.

"Football-plus.az" xəbər verir ki, hətta VAR sisteminin gətirilməsindən sonra da bir çox ölkədə hakimlikdən narazılıqlar davam edir. Yunanıstan çempionatında, bilindiyi kimi, uzun müddətdi, əsas oyunları əcnəbi hakimlər idarə edir. Onların arasında bir neçə dəfə həmyerlimiz Əliyar Ağayev də olub. Türkiyə futbolunda da bu mövzu ciddi şəkildə müzakirə olunur. Məlum olub ki, daha bir ölkə əcnəbi hakimin xidmətindən yararlanmaq qərarına gəlib.

4 milyon əhalisi olan Xorvatiya bizim kimi 10 komandalı kiçik bir çempionata malik olsa da, hətta orda da yerli hakimləri “yola vermirlər”. Bir müddət öncə Xorvatiya futbolunda böyük qalmaqal qopdu. Ötən turun bəzi qarşılaşmalarının VAR hakimlərinin dialoqları ictimaiyyətə sızdırıldı. Sızdırılan materiallar “Hayduk” və Zaqreb “Dinamo”sunun xeyrinə olan hakim səhvlərinə aid idi. Bununla da hakimlər arasında ünsiyyət səviyyəsinin yetərli olmadığı, eləcə də yekun qərar vermək baxımından bəzi yanlışlıqlar ortaya çıxdı. Nəticədə Hakimlər Komitəsinin sədri Bruno Mariç mətbuat konfransı keçirərək hakimlərin doğru qərarlar verdiyini bildirsə də, bunu epizodlarda sübut edə bilmədi. O, özünə və ailəsinə yönələn təhdidlərdən sonra istefa verməli oldu. Bu üzdən Xorvatiya Futbol Federasiyası (XFF) artıq bu gün “Hayduk” ilə Zaqreb “Dinamo”su arasında çempionluq mübarizəsinə təsir edə biləcək matça əcnəbi hakim təyin olunması üçün UEFA-ya müraciət etdi. Maraqlıdı ki, xorvatlar UEFA-dan yalnız təcrübəli hakim tələb etdilər. Eyni zamanda XFF birmənalı şəkildə serbiyalı və sloveniyalı hakimləri istəmədiyini bildirdi. Nəticədə UEFA bu oyuna almaniyalı Daniel Ziberti göndərmək qərarına gəldi. Beləliklə, bu gün Xorvatiya futbolu tarixində ilk dəfə çempionat oyununu əcnəbi hakim idarə edəcək. Hazırda Almaniyanın ən yaxşı ədalət təmsilçilərindən hesab olunan 39 yaşlı Zibert indiyə qədər 165 bundesliqa, 16 AL və 13 ÇL matçını idarə edib. Xorvatiya çempionatında bu mövsüm 3 komanda arasında gərgin çempionluq mübarizə gedir. Sona 9 tur qalmış “Riyeka” 59 xalla 1-ci, “Hayduk” 55 xalla 2-ci, bir oyun az keçirən “Dinamo” isə 54 xalla 3-cü pillədədi.