"Qarabağ" 2023/24 mövsümünün çempionu olmaqla klub tarixinə daha bir şanlı səhifə yazdı. Bu öz yerində, amma daha bir önəmli məqam var.

Söhbət artıq aylardı futbol ictimaiyyətini narahat edən məsələdən – ölkədaxili oyunların boş tribunalar önündə keçirilməsindən gedir. Qurban Qurbanov və komandası ölkə çempionatının, demək olar ki, bütün rekordlarını təzələyib, təzələyir. Məntiqlə ən azı Avropadakı uğurlarına görə tribunalara minlərlə azarkeş gəlməlidi. Amma o azarkeşi nə biz görürük, nə də meydanda sərgilədiyi oyun daha böyük diqqət tələb edən Juninyo, Yankoviç, Veşoviç və başqaları…

"Futbol+"in də dəfələrlə toxunduğu problem heç cür həllini tapmır. Maraq üçün qeyd edək ki, "Qarabağ"ın cari mövsümdə keçirdiyi 14 ev oyununu tribunadan cəmi 17348 azarkeş izləyib. Bu da hər oyuna orta hesabla 1239 nəfər edir. Rəqəmlərin daha az olduğuna şübhə etmirik. Çünki PFL-in rəsmi saytında yerləşdirilən protokollarda azarkeş sayı heç də həmişə dəqiq olmur, adətən, çox göstərilir...

Əlbəttə, problemin, sadəcə, "Qarabağ"la məhdudlaşmadığını bilirik. Hansı premyer-liqa matçında stadionun dolub-daşdığını görmüşük? "Köhlən atlar"ın "Neftçi"ylə üz-üzə gəldiyi matçlarda belə anşlaq yaşanmayıb. Bəs "Qarabağ"ın sosial şəbəkə hesablarında paylaşımları bəyənən, rəy yazan minlərlə, avrokubok oyunlarında "Tofiq Bəhramov"un bir oturacağını belə boş qoymayan onminlərlə azarkeş niyə premyer-liqa matçlarında tribunada yer almır?
Biletlərin qiyməti bahadı? Əsla! Avropada şöhrət qazanmış, daha səviyyəli klubların "göz qoyduğu", başqa ölkələrdən olan rəqiblərlə matçlarda azərbaycanlı azarkeşləri sevindirən futbolçuların ustalığını izləmək niyyətindəsənsə, maddi durum arxa planda olmalıdı. Oyunların başlama vaxtı? Oyunlar əsasən axşam saatlarında keçirilir. Azarkeşlərdən soruşsaq, haqlı və ya haqsız olduqları bir çox səbəb sadalamaq mümkündü. Amma və lakin...
Tribunalar boş olduqca, komandalar azarkeş dəstəyini hiss etmədikcə nəyəsə ümid etməyə dəyməz. Nə futbolun inkişaf səviyyəsi artacaq, nə də ikinci "Qarabağ" olacaq!

Ümumiyyətlə, "mən filan komandanın azarkeşiyəm" deyən adam, tribunada yoxsansa, nə nəticə tələb etməyə haqqın var, nə baxımlı oyun istəməyə, nə də tənqid etməyə... "CBC Sport"un efiri qədər ömrü olan azarkeşliyiniz bunu haqq etmir!

KƏNAN BAHADIR