İtaliya Maliyyə Qvardiyası “Milan”ın ofislərində axtarış aparıb.

Ölkənin nəhəng klubu təhqiqatın nəticəsindən asılı olaraq sanksiyaya məruz qala bilər.

Hüquq-mühafizə orqanının əməkdaşları ekspertizalar aparmaq üçün “Milan”ın ofislərindən sənədləri və kompüter avadanlıqlarını müsadirə ediblər. Təhqiqat heç də əsassız yerə aparılmır. Məsələ ondadı ki, klubun hazırkı baş direktoru Corco Furlani ilə bu vəzifənin əvvəlki icraçısı İvan Qazidis İtaliya Futbol Federasiyasından bəzi məlumatları gizlətməkdə və qurumun təhqiqat aparmasına maneə törətməkdə şübhəli bilinirlər. Təhqiqata “Milan”ın əvvəlki minoritar həmsahiblərinin məhkəməyə şikayəti rəvac verib. Prokurorluğun gəldiyi qənaətə görə, “Elliott Management ” klubu 2022-ci ildə formal olaraq “RedBird Capital Partners”ə satsa da, hələ də “Milan”a böyük ölçüdə sahiblik və nəzarət edir.

“La Gazzetta dello Sport”un yazdığına görə, UEFA təhqiqatın gedişini diqqət mərkəzində saxlayır. Məsələ ilə bağlı şübhələr rəsmən təsdiqini taparsa, “Milan”ı ciddi sanksiya gözləyə bilər. Maraqlıdı ki, “Lill”in də cəzalana biləcəyi istisna olunmur. Fransa klubu “Elliott Management”ə məxsusdu.

Qeyd edək ki, UEFA-nın qaydaları ümumi sahibliyi olan klubların eyni turnirdə çıxışını qadağan edir. Amma bu da var ki, “Milan” hazırda Avropa Liqasında, “Lill” isə Konfrans Liqasında çıxış edir.