KONKAKAF-ın Çempionlar Kuboku
1/8 final, cavab oyunu
İnter Mayami (ABŞ) – Neşvill (ABŞ) 3:1 (2:0)
Qollar: Suares, 8 (1:0). Messi, 23 (2:0). Teylor, 63 (3:0). Sarric, 90+3 (3:1).
İlk oyun – 2:2.
Messi dincəlir – argentinalı ulduzun MLS çempionatında ötən şənbə keçirilən “Monreal”la oyundakı (2:3) yoxluğunu “İnter Mayami” düşərgəsi ictimaiyyətə belə izah etmişdi. İlk məğlubiyyət boş şeydi. Mövsüm uzundu, KONKAKAF-ın Çempionlar Kuboku isə qısa. Üstəlik Leonun oynamaqdan bezdiyi neqativ ötənilki təcrübə də var. Onda argentinalı hər 3-4 gündən bir meydana çıxırdı. Ancaq klub tarixindəki ilk titulu – Liqa kubokunu qazanmaq üçün belə fədakarlıq kifayət etdi. Ardından gələn əzələ zədələri, sonrakı fəsadlar argentinalı ilə yanaşı, dostu Xordi Albanı da müntəzəm çempionatın həlledici mərhələsindən kənarda qoydu, bu isə “İnter Mayami”yə pley-offa vəsiqə qazanmamaq bahasına başa gəldi.

Xerardo Martinonun komandası cavab görüşündə inamlı qələbə qazandı. Messi ilk dəqiqələrdən meydanda “at oynadırdı”. Onun ilk cəhdinin qarşısını Qodoy cərimə meydançasının xətti üzərində kobudluqla aldı. Argentinalının zərbəsi “canlı sədd”ən qayıtdı. İkinci zərbəsi qapının üstündən keçdi. Leo üçüncü hücumda Suaresi qapıçı ilə təkbətək çıxardı və uruqvaylı imkanı qaçırmadı.

Bundan sonra oyun bir müddət qonaqların ciddi təzyiqi altında davam etdi. Ancaq hissənin ortalarında tabloda Messinin soyadı “yandı”. Və bu elə epizod idi ki, kapitandan heç bir sehrbazlıq tələb olunmurdu. Rəqib müdafiəçini bir hərəkətlə işsiz qoyan Qomes cərimə meydançasına elə ötürmə verdi ki, Messinin üzərinə yalnız topu tora göndərmək düşdü. Təbii ki, oyunun taleyinin ilk 23 dəqiqədə həll olunduğunu iddia etməyə dəyməz. Bəlkə də “Neşvill” parlaq ulduzları yoxdu. Bununla belə, çox sabit, xarakterli və sistem əsasında oynayan komandadı. Bəzi epizodlarda “İnter”i qonaqların bitirici mərhələdəki qeyri-dəqiqliyi və ofsaydlar xilas etdi. Bir dəfə də Messinin komandasının köməyinə dirək çatdı.

Fasilədən sonra meydan sahibləri daha çətin anlar yaşadı. Ancaq argentinalı ulduz həmin anları ehtiyat oyunçular skamyasından izləyirdi. Onu artıq 50-ci dəqiqədə əvəzlədilər ki, bu da sağlıq durumunda problem olmasıyla bağlı deyilənləri təsdiqləyir. Leo ilk oyunda möcüzə sayəsində ciddi zədədən qurtuldu, cavab görüşü ərəfəsində isə kapitana yaxın olan insayderlər iddia edirdilər ki, meydana çıxıb-çıxmayacağı ilə bağlı qərar oyun günü veriləcək.
Düşünmək olar ki, “Qızıl top”un son sahibinin zədəsi ciddi deyil. Əks halda biz ilk yarıda faktiki ideal səviyyədə oynayan Messini görməzdik. Reaksiyalara əsasən mühakimə yürütsək, bu dəyişiklik planauyğun idi, ehtiyat oyunçular skamyasında əyləşən Leo gülürdü. Amma bu gülüşü oyunun taleyi həll olunandan sonra gördük, buna qədər isə həyəcanlanmaq üçün əsas var idi. Xüsusən də oyunun gedişində - qonaqlardan kimsə cərimə meydançasında topu qapıya göndərə bilməyəndə, ardından “İnter Mayami”nin qapıçısı Kallender Lovitsanın zərbəsinin qarşısını qəhrəmancasına alanda.

Messini və qalan komanda yoldaşlarını isə Suares sakitləşdirdi. Uruqvaylı 63-cü dəqiqədə baş zərbəsi ilə 3-cü topu qonaqların qapısından keçirən Teylor üçün ideal asma etdi. Düzünü desək, Suares komandaya qoşulandan sonra mayamililərin ən parlaq oyunçusunun kim olduğunu demək çətindi. Bu isə artıq ekspertlərin, jurnalistlərin və azarkeşlərin sevimli mübahisə mövzusudu. Bir-birinə çox möhkəm dostluq telləri ilə bağlı olan Leo və Luis üçün bu məqamın əhəmiyyəti yoxdu. Onlar, sadəcə, birlikdə oynamaq imkanından məmnunluq duyurlar. Arzuların tandemi yenidən iş başındadı. 10 il əvvəl bu tandem Avropanın Çempionlar Liqasını qazanmışdı. İndi isə Şimali Amerikada eyni qənimətin ovuna çıxıblar.

Turnirin 1/4 final oyunları aprelin 1-i və 8-də keçiriləcək. “İnter Mayami” bu mərhələdə “Monterrey”lə qarşılaşacaq. Meksika klubu 1/8 finalın hər iki oyununda “Sinsinnati”yə qalib gəlib (1:0, 2:1).