Yığma oyunları üçün yaranan fasilədə, yəni “İnter Mayami”nin Lionel Messi, Xosef Martines və Teylordan ibarət hücum “üçlüy”ü düşərgədə olmayanda belə bir illüziya yarandı ki, komanda kapitansız da qələbə qazanmağı öyrənib.

"Football-plus.az" xəbər verir ki, Ancaq “Kanzas Siti”yə (3:2) qarşı parlaq oyun elə illüziya idi. Sonrakı – “Atlanta” ilə səfər oyununda argentinalı sifariş ərizəsində olmayanda Florida komandasına MLS-in autsayderlərindən biri olduğunu çox sərt şəkildə başa saldılar.

Həmin 2:5-dən sonra “Mayami”nin pley-offa adlamaq şansı ciddi şəkildə azaldı. Düzdü, ehtiyatda iki oyunu olan floridalıların 9-cu yerdə qərarlaşan “Di Si Yunayted”dən 7 xal geridə qalması faciə deyil. Qalan birbaşa rəqiblər – “Şarlott” və “Nyu-York Siti” ilə müntəzəm çempionatın sonlarında oynamaq lazım gələcək. Bununla belə, baş məşqçi Xerardo Martino prioritetlərini müəyyənləşdirməyə məcburdu. Birincisi, pley-offa vəsiqə əlçatmaz görünür. İkincisi, Liqalar kubokundakı qələbə artıq KONKAKAF-ın Çempionlar Liqasında yeri təmin edib, bu üzdən diqqəti bir həftə sonra keçiriləcək ABŞ Açıq kubokuna yönəltmək daha doğru olardı. Nəhayət, əzələ yorğunluğu üzündən həm DÇ-2026-nın Boliviya ilə seçmə oyununu, həm də fasilədən sonra çempionatdakı ilk oyunu (yuxarıda xatırlatdığımız “Atlanta” ilə qarşılaşmanı) buraxan Messini də qorumaq lazımdı. Martino “Toronto” ilə oyundan əvvəl belə demişdi: “Qısa zaman kəsiyində bir neçə oyun keçirməliyik, baş məşqçi kimi öhdəmə düşən əsas vəzifələrdən biri oyunçuların qayğısına qalmaqdı. Çərşənbə günündən başlayaraq 18 gün ərzində 6 oyun keçirməliyik. Yəni ABŞ Açıq kubokunun finalı da daxil olmaqla hər üç gündən bir oynamalıyıq”.
Ancaq liqanın əsas autsayderi ilə oyunun start heyətində həm saqqalını qırxan Messi, həm də “Atlanta” ilə oyunda çıxış etməyən bütün aparıcı oyunçular – Alba, Krivtsov və Martines göründü. Zamanı geri qaytarıb soruşmaq olar ki, Alba yalnız 34-cü, Messi 37-ci dəqiqəyə qədər dözdüsə, bu qərarın mənası nə idi? Dəyişiklik anında onların üz ifadəsinə əsasən belə qənaətə gəlmək olar ki, çətin bu iki veteran kubokun finalına hazır ola.

Doğrudanmı, Martino bir əldə iki qarpız tutmaq istədi və yanıldı? Oyun göstərdi ki, “İnter Mayami” bu ulduzlarsız da kanadalılarla hesablaşmağa qadirdi. Farias ilk yarının uzatma dəqiqələrində hesabı açdı, 2-ci hissədə isə Teylor dubl etdi, Kremaski də fərqləndi – 4:0. Yeri gəlmişkən, Teylor məhz Messinin əvəzinə meydana çıxmışdı.

Sosial şəbəkələri bəzəyən bir foto var. Argentinalı zədə üzündən meydanı tərk edərkən klubun həmsahibi Devid Bekhem göz yaşlarını saxlaya bilmir. Amerikanın futbol yazarları oyunöncəsi məşqin videoyazısını izləyərkən daha bir maraqlı məqamı üzə çıxarıb. Argentinalının ombasından yapışaraq sanki sağlıq durumunu yoxlamaq istədiyi görünür. Elə Xerardo Martino da oyunsonrası mətbuat konfransında təsdiqləyib ki, hər iki dəyişikliyə məcburiyyət üzündən əl atıb. Messi ilə Albanın sağlıq durumuna qarşıdakı günlərdə aydınlıq gələcək. Ulduzlar meydana çıxmasa və bu qərar “İnter Mayami”yə məğlubiyyət bahasına başa gəlsə, argentinalı mütəxəssis inanılmaz tənqidlə üzləcəşək. Axı “Toronto”nu ulduzlarsız da udman mümkün idi.