Bir neçə gün əvvəl milli komanda ilə bağlı seçimini edən Braim Dias sevindirici xəbər alıb.

O, Mərakeş yığmasına çağrılıb.

“Real”ın 24 yaşlı hücumameyilli yarımmüdafiəçi bundan sonra məhz bu milli komandanın formasını geyəcəyinə özü qərar vermişdi. Atası mərakeşli, anası isə ispaniyalı olan Braim İspaniyanın Malaqa şəhərində doğulub. O, bu ölkənin U-17, U-19, U-21 yığmalarında oynayıb. 2021-ci ildə İspaniyanın əsas millisinin heyətində Litvaya qarşı yoldaşlıq matçında iştirak edib, 4:0 hesablı qələbədə bir qol vurmaqla rol oynayıb. Ancaq sonra İspaniya yığmasında oynamaq şansı əldə etmədiyi üçün Mərakeşi seçmişdi.

Qeyd edək ki, Braim pireneylilərin formasını rəsmi matçda daşımadığı üçün yeni qaydalara əsasən özünün yeni milli komandasını müəyyənləşdirmək hüququna malik idi. Atası mərakeşli olduğu üçün bu hüquqdan yararlanan futbolçu Mərakeşin Anqola və Mavritaniya ilə yoldaşlıq oyunlarında iştirak şansı qazanıb.