“Uşaq və gənclərin fiziki və mənəvi inkişafı” istiqaməti üzrə layihə çərçivəsində yazılarımız davam edir.

Bu yaxınlarda gəncəli güləş məşqçisi Vüsal Qarayevlə həmsöhbət olmuşduq. Vüsal müəllim yetirmələrindən danışarkən Camal Abbasovun adını xüsusi fəxrlə çəkmişdi. Sitat: “Ən böyük uğurumu Camal Abbasovla qazanmışam. Camal 2022-ci ildə 17 yaşlılar arasında güləş üzrə Avropa çempionu olmağı bacarıb. Bu uğurun davamını gözləyirik. Bir il sonra isə Avropa çempionu olmaqla yanaşı, dünya birinciliyində bürünc medala layiq görüldü. Abbasov cəmi 17 yaşında Azərbaycan birinciliyində kişilər arasında üçüncü yeri tutub. Camal məktəblilər arasında da dünya çempionu adını da qazanıb”.
Artıq başa düşdünüz ki, bugünkü müsahibimiz məhz Camal Abbasovdu.

- Camal bəy, ilk sualda ənənəmizə sadiq qalaraq səni oxucularımıza daha yaxından tanıtdırmağa çalışaq. Güləşə gəlişin necə oldu? İlk məşqçini və məşq etdiyin güləş məktəbini necə xatırlayırsan?
- Mən güləşlə 2012-ci ildən məşğul olmağa başlamışam. Özüm idmanla maraqlanırdım, amma məhz güləşə gəlməyimin səbəbkarı atam olub. Yaşadığımız yerdə, demək olar ki, hər kəs güləşlə məşğul olurdu. Elə mən də bir gün küçədə oynayarkən həmyaşıdlarımın güləşə getdiyini gördüm. İstər-istəməz bu da məndə həvəs yaratdı. Atamla danışıb, idmana getmək istədiyimi dedim. O da buna razılıq verdi, məni daha da həvəsləndirdi. Sizə də yaxşı tanış olan bacarıqlı güləş məşqçisi Vüsal Qarayevlə qonşu idik. Beləcə güləşə ilk addımlarımı Vüsal məllimin yanına gedərək atdım. Gəncə şəhərindəki 1saylı Uşaq və Gənclərin İdman Şahmat Məktəbinə gedərək idmana davam etdim.



- Güləşi sənə sevdirən nə oldu? Güləş idmanın başqa növlərindən hansı cəhətlərinə görə fərqlənir?
- Mən 6 yaşımdan güləşlə məşğul oluram. Uşaq vaxtı televizordan güləşçilərimizin uğurlarına baxaraq sevinirdim və bu məndə çox həvəs yaradırdı. Onların fəxri kürsüdə bayrağımızı dalğalandırmaları, himnimizi oxutmaları çox qürurverici idi. Arzulayırdım ki, mən də onlar kimi olum, istəyirdim ki, bayrağımızı dalğalandırım. Şükür ki, onların yolunu davam etdirirəm. Güləşə olan sevgimin ən böyük səbəbkarı da Vüsal məllimimdi. O mənə güləşi sevdirib, mənim üçün də güləş bütün başqa idman növlərindən fərqlidi.



- Karyerana da nəzər salaq. Güləşçi kimi qazandığın uğurlar hansılardı? Qarşıda hansı yarışlar, hansı hədəflər dayanır?
- İlk uğurumu Gəncə şəhərində qazanmışam. Gəncədə keçirilən turnirdə çıxış etdim və həmin yarışda bürünc medal qazandim. Həmin yarışı unutmamağımın bir səbəbi də odu ki, ilk yarışımda qolum sınmışdı. Uşaqlararası dünya məktəblilərinin oyunlarının qalibi olmuşam. Bundan başqa, yeniyetmələr arasinda iki dəfə Avropa çempionatının qalibi olmağı bacarmışam. İlk Avropa çempionluğumu 2022-ci ildə Rumuniyanın Buxarest şəhərində keçirilən yarışda qazandım, həmin vaxt 55 kq çəki dərəcəsində yarışırdım. İkinci Avropa çempionluğumu isə Albaniyanin Tirana şəhərində qazandım, 60 kq çəki dərəcəsində bütün rəqiblərimi üstələdim. Daha sonra Türkiyənin İstanbul şəhərində dünya çempionatının bürünc mükafatçısı kimi fəxri kürsüyə qalxdım. Bu il də həm böyüklər arasında Azərbaycan birinciliyində bürünc medal qazanmışam, həm də gənclər arasında Azərbaycan birinciliyinin qalibi adını qazandım. Ən böyük uğurum Avropa çempionu olmaqdı. Qarşıda olan yarışlar gənclər arasında Avropa və dünya çempionatlarıdı. İnşallah, hədəfim bu il həm Avropa, həm də dünya çempionu olmaqdı. Qarşıdakı ən böyük hədəfim isə hər bir idmançının xəyalı olan Olimpiya Oyunlarının qalibi kimi vətənə dönməkdi.



- Doğulduğun şəhərdə güləşin vəziyyəti necədi? Yeniyetmələrin və gənclərin idmanla məşğul olması, sənin fəth etdiyin zirvələrə çatması üçün uyğun şərait varmı?
- Bildiyiniz kimi, Gəncə güləş məktəbi əvvəldən güclü olub, başqalarından fərqlənib. Hazırda da bu səviyyə qorunur, uşaqların güləşə marağı gündən-günə artır, rəqabət güclənir. Toğrul Əsgərovun davamçıları yetişir, buna heç kimin şübhəsi olmasın. Mənimlə yanaşı, Gəncədə bir çox perspektivli idmançılar var. Şərait əvvəllər elə də yaxşı deyildi, ancaq indi hər cür şərait var.



- İdmançı olmaq, güləşlə məşğul olmaq sənin üçün hansı çətinlikləri yaradıb?
- İdmana peşəkar kimi yanaşmaq, təbii ki, çox ağır işdi. Yəni bu işdə rejim çox böyük rol oynayır. Peşəkar idmançı olmaq istəyirsənsə, rejimə çox böyük diqqət yetirməlisən. Rejim dedikdə təkcə yuxu rejimindən söhbət getmir ki, vaxtlı-vaxtında yatmaq lazımdı. İdmançının yeməyi, telefonla keçirdiyi vaxt, istirahət etməsi kimi vacib nüanslar var. İdmançi bir növ çöldən uzaq qalır. Ancaq idman etməli, yatib dincəlməlidi. Çətinliklərə gəlincə, mən məşq edərkən daha çox əylənirəm. Çünki bu işi böyük həvəslə görürəm. Bu da mənə çətinlik yaratmır. Düzdü, zədələrlə bağlı da müəyyən çətinliklər olur. Şükür ki, onlara da sinə gəririk, beləcə bütün çətinliklər həll olunur.

AMAL ABUŞOV



Yazı Azərbaycan Respublikasının Medianın İnkişafı Agentliyinin maliyyə dəstəyi ilə, “Uşaq və gənclərin fiziki və mənəvi inkişafı” istiqaməti üzrə hazırlanıb.