“Növbəti seçimi edərkən çox ehtiyatlı olmalıyam”
Joze Mourinyo, demək olar ki, artıq iki aydı heç bir komandanı çalışdırmır.
"Football-plus.az" xəbər verir ki, yanvarın 16-da “Roma”dan qovulan 61 yaşlı mütəxəssis boş vaxtlarını məhsuldar keçirməyə üstünlük verir: müxtəlif ölkələrə səyahət edir, müsahibələr verir, reklamlara çəkilir. İndi onun bir gününə nəzər salacağıq.
24 saata sığan ağlagəlməz macəra
Portuqaliyalı martın əvvəlində bu baxımdan daha fəal temp yaxalayıb: bir gün ərzində birdən-birə üç nüfuzlu idman hadisəsinin iştirakçısı olub. Maraqlıdı, indiki yaşında bunu necə bacarıb?
Əvvəlcə Misirə yollanan işsiz məşqçi bu ölkənin kuboku uğrunda “Zəmələk” və “Əl-Əhli” arasında keçirilən final matçını izləyib. Afrika ölkəsində onu təmtəraqla qarşılayıblar, hətta kuboku məşhur braziliyalı sabiq futbolçu Ronaldo və italiyalı canlı əfsanə Françesko Totti ilə birlikdə meydana gətirmək şərəfinə layiq biliblər. “Əl-Əhli” qalib gəlib, Mourinyo “Zəmələk”in məğlubiyyətə layiq olmadığını deməsi ilə diqqəti cəlb edib:
“Nəticə heç də ədalətli olmadı. Fikrimcə, mübarizə “overtaym”a qədər uzanmalı idi. Amma futbolda belə sonluğa daha çox rast gəlinir: böyük komandalar həlledici oyuna çıxırlarsa, əksər hallarda qələbə qazanırlar. Kimlərsə bunu bəxtə, bəziləri təcrübəyə bağlayırlar. “Zəmələk” oyunu əla keçirdi, amma qolu “Əl-Əhli” vurdu”.
Don Jozenin növbəti səfəri Səudiyyə Ərəbistanına olub. Bu ölkənin paytaxtı Ər-Riyadda təşkil edilən Entoni Coşua ilə Frensis Nqannu arasındakı boks döyüşünə tamaşa edib. Nqannunun nokauta düşməsini ilk sıralardan izləyən Mourinyo Coşuanı qələbə münasibəti ilə təbrik edən ilk şəxslərdən biri olub. Onun döyüşlə bağlı açıqlaması:
“O, çox güclüdü, üstəlik, böyük potensiala malikdi. Bu isə Entoniyə üstünlük qazandırır. Valehedici döyüşçüdü. Coşua rinqə çıxış tərzi ilə döyüşü qısa zamanda başa vurmaq niyyətini hamıya bəyan etmişdi”.
Təcrübəli mütəxəssis döyüşdən sonra Tayson Füri ilə şəkil çəkdirməyi də lazım bilib!
Bundan sonra isə Ciddəyə yollanıb. “Formula-1”in növbəti mərhələsinə tamaşa etmək üçün Ər-Riyaddan təxminən 1000 kilometr məsafədə yerləşən şəhərə üz tutub. Məhz burda karyerasını mümkün qədər tezliklə bərpa etmək istəyini dilə gətirib:
“Böyük ehtimalla yayda işbaşına keçəcəyəm. Bu işin necə olduğunu bilirəm. Ən yaxşı qərarı verməyə çalışacağam. Belə proseslər həmişə eyni olur. Fernando Alonsoda olduğu kimidi. Qələbə üçün şəraiti olmayan komandada qərar tuta bilərsiz, amma çoxları sizdən qələbələr gözləyir. Son vaxtlar mən də belə vəziyyətdə işləməli olmuşam. Mən heç vaxt uğur qazanmayan komandaları çalışdıra bilərəm. Sadə futbolsevərlər isə səndən həmişə möcüzələr gözləyirlər. Deməli, növbəti seçimi edərkən çox ehtiyatlı olmalıyam”.
Onun hansı iş variantları var?
Əlbəttə, indi çoxlarını onun növbəti dayanacağının hansı komanda olacağı maraqlandırır. Son iki ayda bu mövzuda kifayət qədər xəbər yayılıb.
* “Roma”dan istefaya göndəriləndən dərhal sonra “Əl-Şəbab”da qərar tutacağı xəbəri verildi. Lakin Mourinyo bu variantı qısa zamanda təkzib etdi. Meneceri isə don Jozenin hələ də top-klublara layiq məşqçi olduğu fikrini səsləndirdi.
* Sonra “Napoli” ilə danışıq apardığı iddia olundu. Ancaq bu iddianı İtaliya klubunun prezidenti Aurelio De Laurentis təkzib etdi.
* Daha sonra adı “Bavariya”, “Barselona”, “Çelsi” və “Mançester Yunayted” ilə birgə hallandı. Amma bu klublardan heç biri onunla danışıq aparıldığı iddiasını təsdiqləmədi.
Onda ortaya bu sual çıxır: Mourinyonun yolu haradı? Bir az da gözləyək...
Digər xəbərlər
