“Ümumi əhval-ruhiyyə necə ola bilər?! Bir Azərbaycan komandası Avropanın ikinci mötəbər futbol turnirində 16 ən yaxşı komandadan biridi. Bu fantastika deyil, nağıl deyil, reallıqdı. "Qarabağ" psixologiyamızı o qədər dəyişib ki, azarkeşlərdə komandanın avrokubok qazanacağına inam yaranıb. Oyunda da var gücümüzü, hətta bundan da artığını ortaya qoyacağımıza şübhə yoxdu. Dünyanın müxtəlif yerlərində yaşayan azərbaycanlılar Leverkuzenə axışır. Bizim komandanın azarkeşləri üçün ayrılan tribunanın dolacağı şübhə doğurmur. Bildiyimə görə, "Milli dəstə" Leverkuzendə 500 nəfərlə təmsil olunacaq. Mindən çox soydaşımızın bilet üçün müraciət etməsi haqda xəbərlər var. Təbii ki, almanlar komandalarından yalnız qələbə gözləyir. Bu mövsüm Avropanı lərzəyə gətirən "Bayer-04" möhtəşən məğlubiyyətsizlik seriyasını davam etdirməyə iddialıdı. Bakıdakı ilk matçdan sonra bu gün tam bacarıqlarını ortaya qoyacaqlarına şübhə etməyə dəyməz. “Qarabağ"ın bura qədər gəlməsi artıq möcüzədi. Daha bir tarix yazmaq üçün şans var. Amma rəqib, dediyim kimi, Avropanın ən yaxşı formada olan komandasıdı. Emosiyaları kənara qoyub, real yanaşsaq, məncə, şansımız yoxdu. Amma "Qarabağ" reallıqla uzlaşmayan çox nəticə göstərib. İndi burda olması da fantastik nəticədi. Ona görə qəlbimin dərinliyində, əlbəttə, kiçik bir ümid var ki, bəlkə Qurban Qurbanovun yetirmələri xalqımıza daha bir möcüzə yaşadalar".