“Real”ın klub televiziyası hazırda İspaniya futbolundakı müntəzəm qalmaqalların əsas qaynağıdı. Adı çəkilən media qurumu artıq aylardı hakimləri, rəqibləri, ümumiyyətlə, “Real”ın əleyhinə çıxış edən hər kəsi yamanlayır. Efirdə hakim səhvləri ilə bağlı çarxlar görünür, aparıcılar isə utanıb-çəkinmədən istənilən ifadəni işlətməyi özlərinə rəva bilirlər.

Məsələn, “Atletiko” ilə İspaniya Superkuboku (4:2) uğrundakı oyundan sonra RMTV-də hakimlərin işi tənqid olundu: “Bu gün utanc günüdü. Unutmayın ki, Kuadra Fernandes “Atletiko”nun Klos Qomesidi. “Barselona” Klos Qomesin idarə etdiyi oyunlarda heç vaxt uduzmayıb, o, VAR-a görə cavabdehlik daşıyır, Kuadra Fernandesin idarəçiliyi dözülməzdi”.

Rəsmi qaynaqdan daha çox azarkeş şərhinə oxşayır, eləmi? Bu çıxış İspaniyada böyük əks-səda doğurdu. Amma “Real”ın kanalı dayanmaq fikrində deyildi. Elə həmin Superkubokun finalında “Real”a uduzandan sonra Xavi hakimlikdən şikayətləndi və kanalın aparıcıları dərhal “Neqreyro işi”ni xatırlatdı. Xatırladaq ki, “Barselona” bu işə görə üç maddə üzrə suçlanır: idman biznesində korrupsiya, sənədlərin saxtalaşdırılması, pis idarəçilik. İndi də klub telekanalının Xaviyə cavabına baxaq: “Balaca quşlar ov tüfəngindən atəş açır. Dünya alt-üst oldu. Biz özümüzü hədsiz hörmətli apardıq, İspaniya futbolunun zərər gördüyü nəhəng qalmaqalı hətta şərh etmədik. İndi o araşdırılır. Bax, buna görə deyirik ki, dünya baş-ayaq olub. Həm “Real”, həm də onun klub teleziviyası həmişə “Neqreyro işi”nə böyük hörmətlə yanaşıb. Xavi diqqəti Superkubokun finalında yaşananlardan uzaqlaşdırmaq istəyir. “Real” “Barsa”ya ciddi zərbə vurub, Ançelotti isə ona futbol dərsi verib. “Barselona”, demək olar ki, 20 il ərzində hakimlikdəki ikinci şəxsə pul ödəyib. Xavi həmin dövrdə “Barsa”nın oyunçusu kimi 600-dən artıq oyuna çıxıb. Bu 600 oyun şübhə altındadı. Bunu biz demirik, klub bunda ittiham olunur. İttiham Xavinin “Barselona”nın futbolçusu olduğu bütün dönəmə aiddi”.

RMTV noyabrda “Rayo Valyekano” ilə oyundakı hakim idarəçiliyini də tənqid etdi: “Bizim xülasə: şübhəli məqamlarda fil çalmayacaqlar. Birilərinin ayağının altına xalça sərirlər, o birinin ayağının altına daş tökürlər”.

Düzdü, bu kanalda tərifləməyi də bacarırlar. “Almeriya” ilə oyundan sonra jurnalistlər “Real”ın qapısına vurulan qolu ləğv edən hakimə hörmətini gizlətmədi: “VAR elə məhz bunun üçün lazımdı. Ədalət görməyə öyrəşməmişik. Ancaq biz həmişə ona tərəfdarıq ki, şübhəli məqamlarda hakimlər texnologiyaların köməyindən yararlansın”.

“Sevilya” ilə fevralın 25-də keçirilən (“Real” 1:0 qalib gəldi – red.) oyundan əvvəl klubun televiziyası yenidən sevimli fənddən yararlandı – RMTV-də qarşıdakı oyunda söz sahibi olacaq İsidro Dias de Mera Eskuderosun idarəçilik üslubu müzakirəyə çıxarıldı. Belə münasibətə dözməyən “Sevilya” “Real”dan şikayətləndi.