Biri “Qarabağ”dan qələbə gözləyir, o biri məğlubiyyət
Bu gün Avropa Liqasının 1/8 final mərhələsinin ilk oyununda “Qarabağ”la “Bayer-04” üz-üzə gələcək.
Ağdam təmsilçisi həm növbəti tarixi nəticə, həm də çox çətin sınaq qarşısındadı. Rəqib də bu mövsüm Avropada məğlubiyyətizlik seriyasını davam etdirən yeganə komandadı. Bəs “Qarabağ” sərfəli nəticə əldə etmək üçün nəyə ümid edə bilər? “Football-plus.az” menecerlərin bu haqda fikirləri öyrəndi.
Emil Şükürov:
“Birmənalı şəkildə "Qarabağ" üçün çətin sınaq olacaq. Eyni zamanda "Bayer-04" üçün də bu səfər oyunu asan keçməyəcək. Qrup mərhələsindən fərqli burda tam başqa əhval-ruhiyyə olacaq. Cütün favoriti Almaniya klubu olsa da, "Qarabağ"da özünəinam hissinin yüksək səviyyədə olduğuna inanıram. Ötən il Bakıda keçirilən oyun "Qarabağ"ın potensialını ortaya qoydu, Qurban Qurbanovun və yetirmələrinin heç bir parametrdə rəqibdən zəif olmadığını göstərdi. İki oyundan ibarət olan bu mərhələdə daha az səhv edən komandanın şansı da çox olacaq. İdeal ssenaridə "Qarabağ"ın 1:0 hesablı qələbəsini gözləyirəm”.
Erkin İbrahimov:
“Minimal hesablı məğlubiyyət gözləyirəm. Doğrusu, hələ o səviyyəyə çatmamışıq ki, qələbə qazanmaq haqda danışaq. Sözsüz, bu futboldu və hər şey ola bilər. Şansımız üzümüzə gülərsə, ən yaxşı halda bərabərlik ola bilər”.
KAMAL SƏFƏR
Digər xəbərlər
