Dünən 1-ci liqada 17-ci tura start verildi.

Binədə keçirilən ilk oyunda MOİK “Araz Saatlı”nı məğlub etdi. Maraqlıdı ki, liqanın favoritlərindən sayılan “hərbçilər” aşkar autsayderlə dueldə çətinlik çəkdi. Bunu çətin durumda olan qonaqların böhrandan çıxmaq yönündə addımı kimi qiymətləndirmək olarmı? Yoxsa hər şey təsadüfdü? Bunu növbəti oyunlarda biləcəyik. Yekun nəticə odu ki, ordu klubu qələbə qazandı və zirvəyə şərik oldu.

Tura bu gün keçiriləcək görüşlərlə yekun vurulacaq. Birinci qarşılaşmada “Qaradağ Lökbatan” “İmişli”ni qəbul edəcək. Qeyd edək ki, komandalar eyni xalla turnir cədvəlinin 2-3-cü pillələrini bölüşür. Belədə gərgin mübarizənin şahidi olacağımıza şübhə yoxdu. Çünki nə Azər Həşimovun, nə də Əsgər Abdullayevin komandası məğlub olmaq istəməyəcək.

Günün ikinci oyununda “Karvan” “Şamaxı”nı qonaq edəcək. Yevlax təmsilçisi ötən həftə builki ilk məğlubiyyətini yaşadı. Təzyiq altına düşməmək və çempionluq iddiasını qorumaq üçün bu matçda qələbə mütləq xarakter daşıyır. Srağagün heyətini nigeriyalı futbolçu Sonaqo İsmael Noufounla gücləndirən komanda uğurlu çıxış etməli və xal fərqini azaltmalıdı. “Şirlər” isə “Zaqatala”nı məğlub edə bilmədiyinə görə ruhdan düşməməli və var gücüylə premyer-liqa hədəfinə can atmalıdı.

Günün 3-cü oyununda “Zaqatala” “doğma divarlar” arasında “Mingəçevir”i məğlub etməyə çalışacaq. Ara-sıra qazanılan uğurlar sayəsində ortabab komandalar sırasında qərarlaşan komanda bu rəqibə də “dişini göstərməlidi”. “Nur şəhəri” təmsilçisinin isə işi çətindi. Komanda 5 turdu qələbəyə həsrətdi. Tilsimin bu oyunda qırılması isə şübhə altındadı. Tura “Difai Ağsu” – “İrəvan” matçıyla yekun vurulacaq. Meydan sahibləri autsayder statusunu “qoryub-saxlayır”. Qərbi Azərbaycan təmsilçisinin durumu da ürəkaçan deyil. Çempionluq iddiasından əl çəkən komanda zamanla orta pillələrə enib. Çox güman, mövsümün sonuna qədər belə də davam edəcək. Çünki klub büdcə sıxıntısını aradan qaldıra bilmir. Bu yöndə şikayət çoxdu. Buna baxmayaraq, rəqibin zəif olması “İrəvan”ı bir qədər ruhlandıra bilər.

6 mart
MOİK – Araz Saatlı 6:4
Elmir Rəhimzadə, 23; 87. Ramil Orucov, 37. Nicat Əskərov, 39. Nihad Qurbanlı, 58. Cavidan Abbaszadə, 82 - Nurlan Bayramov, 44-öz qapısına. Sequn Omotoşo, 48. Şamil Abdullayev, 62. Rəvan Əvəzov, 77.

7 mart
Qaradağ Lökbatan – İmişli 1:0
Murad Qayalı, 85.
Lökbatan, Olimpiya İdman Kompleksinin stadionu. Saat 15.00.

Karvan – Şamaxı 0:6
Səbayıl Bağırov, 13. Bəhruz Teymurov, 26. Cəlal Cəbrayılov, 32. Abbas Ağazadə, 38. Emin Zamanov, 86-p. Bəhruz Teymurov, 90+2.
Yevlax, şəhər stadionu. Saat 15.00.

Zaqatala – Mingəçevir 1:2
Rəhman Şabanov, 28 - Elnur Mirzəyev, 1. Nihad Xəlilli, 85.
Zaqatala, Olimpiya İdman Kompleksinin stadionu. Saat 15.00.

Difai Ağsu – İrəvan 3:0
İlham Allahverdiyev, 13-p. Bayraməli Qurbanov, 23. Kristian Kamta, 65. İlham Allahverdiyev, 87, 90.
Şamaxı, şəhər stadionu. Saat 15.00.

Xal durumu: Qaradağ Lökbatan - 35, Şamaxı – 33, MOİK, İmişli – 32, Karvan – 27, İrəvan – 23, Zaqatala – 19, Mingəçevir – 18, Difai Ağsu – 12, Araz Saatlı – 4.
Bombardir: Elşad Tağıyev (Şamaxı) – 11.

KƏNAN BAHADIR