Məlum olduğu kimi, builki Yay Olimpiya Oyunları iyulun 26-sı – avqustun 11-i aralığında Fransanın paytaxtı Parisdə keçiriləcək. Ümumilikdə 32 idman növündə 329 medal dəsti sahibini tapacaq.

"Football-plus.az" xəbər verir ki, fevralın 8-də Paris-2024-ün təşkilat komitəsinin ofisində 33-cü Yay Olimpiya Oyunlarının medalları ictimaiyyətə təqdim olunub. Medalların tərkibində Parisin və bütün Fransanın rəmzi olan Eyfel qülləsinin metal hissəsi də yer alıb. Bu, Olimpiada-2024-ün mükafatlarını 1896-cı ildə keçirilən ilk müasir Oyunlardan bəri təqdim olunan 36600 medaldan fərqləndirir.

Paris mükafatlarının dizaynını Fransanın ən zəngin biznesmenlərindən olan Bernar Arnonun LVMH şirkətlər qrupuna aid “Chaumet” (“Şome”) zərgərlik evi hazırlayıb. Medallar Fransa paytaxtının zərbxanası tərəfindən hazırlanacaq.

Olimpiya Oyunlarının medallarının mərkəzində Eyfel qülləsinin orijinal metalından hazırlanan altıbucaqlı yer alıb. Tarixdə belə bir populyar baxış daşlaşıb: Fransanın materik hissəsi xəritədə məhz bu həndəsi fiqura bənzəyir. Məhz belə dizayn seçimi Oyunların yalnız Parisdə yox, Fransanın başqa şəhərlərinin də ərazisində keçiriləcəyinə dair mesajdı.

Bildiyiniz kimi, Eyfel qülləsi bu qurğunun əsas memarı Qustav Eyfelin adını daşıyır. Fransalı mühəndis özü onu, sadəcə, “300 metrlik qüllə” adlandırırdı. 1889-cu ildə müvəqqəti qurğu kimi tikilən qüllə Paris Ümumdünya Sərgisinin tağı rolunu oynamalıydı. İlkin plana görə qüllə 20 ildən sonra sökülməliydi. 1887-ci ildə tikinti başlayanda ölkənin 300 yazıçısı, rəssamı və musiqiçisi olun əleyhinə çıxdı. Etirazçı incəsənət adamları arasında Aleksandr Düma (oğul), Gi de Mopassan, Şarl Quno kimi məşhurlar da var idi. Onlar qülləni “çirkin skelet”, “faydasız və dəhşətli”, “gülməli və zavodun tüstü bacası kimi Paris üzərində hökmran olan”, “şəhərin üzərində mürəkkəb ləkəsi kimi görünən mənfur dəmir-vint yığını” kimi xarakterizə edirdilər. Bununla belə, qüllə sərginin keçirildiyi yarım ildə möhtəşəm effekt doğurdu və dünyanın hər tərəfindən gələn adamların diqqətini cəlb etdi. Parisin məşhur rəmzi dünyanın ən çox ziyarət olunan və ən çox şəkilə çəkilən obyektinə çevrildi.

Olimpiadanın medallarının hazırlanması üçün lazım olan material Eyfel qülləsinin yenidən qurulması zamanı artıq qalan hissələrdən götürülüb, qüllənin metalı mükafatların üzərində orijinal rəngindədi.

Bu element 2024-cü il Oyunlarının emblemi ilə bəzədilib və bütün nominallarda - həm qızıl, həm gümüş, həm də bürünc medallarda mövcuddu. Həmçinin altıbucaqlının konturu boyunca nazik xətlər çəkilib - təsvirə relyef və parlaqlıq verən şüalar kimi. Bu yaradıcı ideya özündə həm Fransanın dünyadakı, həm də idmançıların özlərinin - Olimpiadanın qaliblərinin parıltısını gizlədir. Hər bir medalın üzərində fransız dilində idman növünün, yarışın adı həkk olunub. Medalın diametri 85 mm, qalınlığı isə 9,2 millimetrdi. Əvvəllər Eyfel qülləsinin bir hissəsi olan metalın hər mükafatdakı payı 18 qramdı. Medalların hər biri fərqli çəkiyə malikdi: qızıl medal 529, gümüş medal 525, bürünc medal 455 qramdı. Ümumilikdə 5084 medal hazırlanıb.
Olimpiada-2024-ün təşkilat komitəsinin rəhbəri Toni Estanqe bildirib ki, Eyfel qülləsinin metalından istifadə ideyası medalları unikal və təkrarolunmaz etmək istəyindən irəli gəlir: “Bu qiymətli metalların - qızıl, gümüş və bürüncün Fransanın mirvarisi olan Eyfel qülləsinin ən qiymətli metalı ilə birləşməsi üçün çox böyük iş görülüb. Odu ki, 2024-cü ilin Oyunlarının medallarının özəlliyi metalların qovuşması, əriməsidi. Biz istəyirdik ki, Eyfel qülləsinin orijinal metalı olan dəmir bu medallarda olsun və 2024-cü il Oyunlarında idmançıların medalları bu metalla bəzədilsin”.

Biatlon üzrə beşqat olimpiya çempionu, Olimpiadanın idmançılar komissiyasına rəhbərlik edən Martin Furkad əlavə edib ki, Parisdə keçiriləcək Oyunlarda təqdim olunacaq mükafatların dizaynını hazırlayarkən yaradıcılar idmançıların istəklərini rəhbər tutub: “Paris-2024-ün təşkilat komitəsi həmişə olduğu kimi, idmançıları diqqət mərkəzində saxladı. Biz iki şeyə nail olmaq istəyirdik: olimpiyaçıların və paralimpiyaçıların medalları eyni olsun, medalların tərkibində ölçüyəgəlməz dərəcədə dəyərli metal (Eyfel qülləsindən) yer alsın. Bizi üç şey ruhlandırdı: altıbucaqlı, Fransa və medalın qiymətli daş kimi görünməsi arzusu. Buna görə də o, qiymətli daş kimi çərçivəyə salınıb”.