“Udineze” ev oyunlarını keçirdiyi “Blue Energy” stadionunda günəş panellərindən istifadə etməklə yeniliyə imza atıb.

2500 günəş panelinin quraşdırıldığı stadionda il ərzində 1 milyon meqavatdan çox elektrik istifadə olunacaq. Klub bu layihə ilə günəş panellərindən ibarət ilk idman parkı yaratmaq niyyətindədi.

“Bunu etməklə biz, sadəcə, elektrik enerjisinə qanaət etmək niyyətimizi göstərmirik. Həm də klub olaraq, sosial mesaj ötürürük”, - deyə “Udineze”nin reklam direktoru Maqda Potso bildirib.

Klub rəsmisi karbon emissiyaların azaldılması yolunda unikal addım atdıqlarını diqqətə çatdırıb. Qeyd edək ki, “Udineze”nin stadionu bu layihəyə 4 il öncə başlayıb. 2022-ci ildə eyni məqsədlə “Qalatasaray” da stadionunda günəş panellərindən istifadə etməyi qərara alıb. İstanbul təmsilçisinin stadionu 10 mindən çox günəş panelinin istifadə olunduğu ilk arena kimi "Ginnesin Rekordlar Kitabı"na düşüb.