Çərşənbə axşamı Çempionlar Liqasının 1/8 final mərhələsinin ilk oyunu çərçivəsində “İnter” “Atletiko”nu 1:0 hesabıyla məğlub etdi. “Hindular”ın qapısından qələbə topunu 34 yaşlı Marko Arnautoviç keçirdi.

...Arnautoviç nə vaxtsa böyük istedad və ondan da kiçik olmayan eqo sahibi, eyni zamanda axmaq xarakterə malik birisi idi. “Quql”da axtarış verməklə bununla bağlı çoxlu tarixçə tapmaq olar. Əlbəttə, karyerasının “İnter” dönəmi belə nümunələrlə zəngindi. Arnautoviç “Tvente”də möhtəşəm mövsüm keçirəndən sonra (12 qol vurmuşdu) 2009-cu ilin yayında Milana təşrif buyurdu. Ondan başlayaq ki, Marko Mario Balotelli ilə eyni nömrədə yaşayırdı. Təkcə bu fakt mətbuata çıxan tarixçələrdən başqa ən qəribə olayların yaşandığını düşünməyə əsas verir.

“Bentli” olayını Arnautoviçin öz dilindən eşidək: “Yenicə sürücülük vəsiqəsi almışdım, Samuel Eto’Оya dedim ki, maşın almaq istəyirəm. Cavab verdi ki, alma, özümkünü sənə bağışlayıram. “Bentli”sini mənə verdi, çox sevindim. Hər gün şəhərdə dolaşırdım, daim maşını yuyurdum, onu yaxşı vəziyyətdə saxlayırdım. Sem məndən maşına yaxşı baxmağı xahiş etmişdi. Ancaq bir dəfə restorana yollandım, orda 45 dəqiqə keçirdim, çıxanda isə maşını yerində görmədim. Əvvəlcə düşündüm ki, düzgün parklama etmədiyimə görə maşını cərimə meydançasına aparıblar. Yox, belə deyilmiş. Şokdaydım, ürəyim bulanırdı, çox qorxmuşdum. Semə zəng vurub dedim ki, maşını qaçırıblar. Ancaq o mənə münasibətdə xeyirxah idi, dedi ki, bu, sənin günahın deyil. Hər gün zəng edib üzrxahlıq edirdim. Bəlkə də 100 dəfə zəng etmişdim. “Verder”ə keçəndən sonra mənə zəng edib dedilər ki, maşın tapılıb. Ondan sonra mənəvi rahatlıq tapdım”.

Arnautoviçin ən yaxşı xarakteristikasını Joze Mourinyo verib: “Marko fantastik oğlandı, ancaq özünü uşaq kimi aparır. Mario Balotelli isə onun ən yaxın dostudu”.

Təəccüblü deyil ki, serb köklərinə malik avstriyalı (atası serb, anası avstriyalıdı, Marko pravoslav xristiandı) “İnter”də cəmi bir mövsüm davam gətirdi – Milan klubu “Tvente”dən onun transfer hüququnu ələ keçirmədi. Sonra onun karyerasında “Verder”, “Stok Siti”, “Vest Hem”, başqa çoxlu tarixçə oldu – sərxoş halda maşın sürməkdən tutmuş itlə oynayarkən diz bağlarını zədələyib uzun müddətə sıradan çıxmağa qədər. Devid Moyes “Vest Hem”i çalışdırarkən onu ictimaiyyət önündə belə tənqid etmişdi: “Mən Markonu yanıma çağırıb dedim: “Qollar vursan və təhlükəli vəziyyətlər yaratsan, oynayacaqsan. Qaçmağa və komanda üçün çalışmağa başlasan, oynayacaqsan. Ancaq bütün bunlardan ən azı biri mənə lazımdı”.

Çin və MY-dən imtina
Arnautoviç 2019-da Çinə yollananda – onda artıq 30 yaşı var idi – hər kəsə elə gəldi ki, bu, böyük Avropa karyerasının sonudu. Çin, Birləşmiş Ərəb Əmirlikləri... Onun 2021-ci ilin yayında İtaliyaya dönüşü sürpriz oldu. Ancaq 32 yaşlı futbolçunun A seriyasının ortababı “Bolonya”da iki mövsüm ərzində bütün turnirləri nəzərə alsaq, 25 qol vurması daha böyük sürpriz idi. Və söhbət təkcə statistikadan da getmir. O, gerçəkdən gənclikdə soyadına, xarici görünüşünə, fiziki göstəricilərinə, oyun üslubuna və axmaq xarakterinə görə müqayisə olunduğu Zlatan İbrahimoviçi xatırlatmağa başladı. Arnautoviç “Bolonya”da özünü necə rahat hiss edirdisə, dediyinə görə, 2022-ci ilin yayında hətta “Mançester Yunayted”ə keçiddən də imtina etdi: “Mançester Yunayted” bir neçə dəfə mənlə müqavilə bağlamaq istədi. İtaliyada qalmaq qərarı çətin idi, ona görə ki, ailəm İngiltərəyə qayıtmaq istəyirdi. Mənə aydındı ki, “qırmızı şeytanlar” daim zirvədə olan klublardandı, “Bolonya” isə yox. Ancaq bu normaldı. Burda hər şey sakitdi, özümə həsr etmək üçün vaxtım var, heç bir stress yaşamıram”.

Milan
Ancaq ötən yay “İnter”ə “yox” deməyi bacarmadı. Maraqlıdı ki, Milan klubu həmin vaxt avstriyalı ilə yanaşı, daha iki veterana - 35 yaşlı Xuan Kuadrado ilə Aleksis Sançesə də qucaq açdı. Marko Milan klubuna keçəndən sonra belə dedi: “14 il əvvəl burda olmuşam, ancaq onda oyunçudan daha çox fanat idim. Hər şeyə görə özündən tez çıxan gənc idim, futbola o qədər də köklənmirdim, ancaq indi hər şey fərqlidi. Ailəm var, daha sakit həyat tərzi sürürəm. Ümid edirəm ki, hər şey yaxşı olacaq. Fiziki cəhətdən güclüyəm, bura qollar vurmaq üçün gəlmişəm”.

14 il əvvəl olduğu kimi, yenə işlər qaydasında getməyə bilərdi. Onda Markoya bütün başqa məsələlərlə yanaşı, mövsümün əvvəlində aldığı zədə də mane olmuşdu. İndi isə A seriyasının elə ilk turunda – “Montsa” ilə oyunda məhsuldar ötürmə verməsinə baxmayaraq, “İnter”in baş məşqçisi Simone İnzaqi mövsümü möhtəşəm keçirən Markus Türamın əvəzedicisi kimi görür. Arnautoviç A seriyasının cari mövsümündə keçirdiyi 17 oyunun yalnız ikisində start heyətində görünüb. Ancaq görünür, forvard gerçəkdən də müdrikləşib, ağıllanıb, heyətə düşməməklə bağlı narazılıq etmir. Arnautoviçin qələbə topunu vurduğu “Atletiko” ilə oyun da qəribə alındı. Türam zədə almasaydı, yəqin ki, avstriyalı forvard bu oyunda şans qazanmayacaqdı. Bu başqa məsələ ki, Marko belə xoşbəxtliyi haqq etmişdi. “İnter”in müdafiəçisi Karlos Auqustonun oyundan sonra dediyi sözləri eşidək: “Arnautoviçə görə şadam – qeyri-adi oğlandı. Məşqlərdə çox çalışır və uğuru haqq edir”.

Bir sözlə, 30 yaşı tamamlayandan sonra da istedadı gerçəkləşdirmək olar. Yaxşı ki indi Arnautoviç Balotelli kimi papağını günə yandırmır.