İspaniya çempionatının 26-cı turunda nəzərdə tutulan on oyundan biri baş tutmayacaq. Bunun səbəbi ciddi hadisə ilə bağlıdı.

“Football-plus.az” xəbər verir ki, Valensiya şəhərinin Kampanar rayonunda yerləşən 14 mərtəəli binada yanğın baş verib. İlkin məlumata görə, qəza nəticəsində 4 nəfər həlak olub, 14 nəfər isə müxtəlif dərəcəli xəsarətlər alıb. Şəhərin meri Mariya Xose Katala üçgünlük matəm elan edib. Yerli “Valensiya” və “Levante” rəhbərliyi La Liqadan bu komandaların həftəsonu keçirməli olduğu matçların təxirə salınmasını xahiş edib. Xahiş tərəddüdsüz yerinə yetirilib. Nəticədə La Liqanın fevralın 24-nə təyin olunan “Qranada” – “Valensiya” və həmin gün 2-ci divizionda keçirilməli olan “Levante” – “Andorra” matçları qeyri-müəyyən müddətə təxirə salınıb.
Əlavə edək ki, İspaniyada bütün liqalarda həftəsonuna təyin olunan oyunlar birdəqiqəlik sükutla başlayacaq.