Bu həftə keçirilən oyunlardan sonra Çempionlar Liqası, Avropa Liqası və Konfrans Liqasında klubları mübarizəni davam etdirən ölkələrin sayı 19-a endi.

Təbii ki, ölkəmizin adını bu siyahıda görmək çox xoşdu. Səbəbkar isə “Braqa”nı iki oyunun nəticəsinə görə Avropa Liqasının pley-offundan kənarda qoyan “Qarabağ”dı.

Azərbaycan turnirdə mübarizəni davam etdirənlər arasında UEFA-nın əmsallar cədvəlində ən aşağı – 27-ci pillədə qərarlaşan ölkədi. Bizdən yuxarıda olan bəzi ölkələrin isə qitə turnirlərində təmsilçiləri qalmayıb. Bunlar Ukrayna, Serbiya, Polşa, Cənubi Kipr, Macarıstan, İsveç, Rumıniya və Bolqarıstandı.

Ümumilikdə avrokuboklar uğrunda mübarizəni davam etdirən 48 klub bu ölkələri təmsil edir: İngiltərə (6), İspaniya (5), İtaliya (7), Almaniya (5), Fransa (3), Niderland (2), Portuqaliya (3), Belçika (2), Türkiyə (1), Şotlandiya (1), Çexiya (3), İsveçrə (1), Avstriya (1), Danimarka (1), Norveç (1), İsrail (2), Yunanıstan (2), Xorvatiya (1), Azərbaycan (1).
Bildiyiniz kimi, Avropanın klub turnirlərində 55 ölkənin təmsilçiləri çıxış edir. İndiyə qədər 36 ölkə mübarizədən çəkilib.

“Qarabağ” mərhələni adlamaqla klub reytinqini də yaxşılaşdırdı. 1 bonus xalı qazanan ölkə çempionu hazırda 32 xalla 56-cı pilləni “Fənərbaxça” və “Seltik” ilə bölüşür. “Köhlən atlar” İstanbulun digər nəhəngi “Qalatasaray”ı (31,500), həmçinin “Fiorentina”nı (31) arxada qoydu.

Ölkə reytinqinə gəlincə, Azərbaycan hələ ki 27-ci pillədən yuxarı qalxa bilməyib. Ağdamlıların mərhələ adlaması ölkə reytinqinə daha 0,250 əmsal qatdı. Nəticədə ölkəmizin cari mövsümdəki əmsalı 5,625-ə çatdı. Son 5 mövsümdəki ümumi əmsal isə 19,875-ə bərabərdi. Bununla da Azərbaycanın UEFA reytinqində cari mövsümü ən azı 27-ci pillədə başa vuracağı dəqiqləşdi. Bolqarıstandan 0,5 bal geri qalırıq, bu ölkənin isə avrokuboklarda təmsilçisi qalmayıb. “Qarabağ”ın 1/8 finalda bir qələbəsi Bolqarıstanı da arxada qoymağa bəs edəcək.
UEFA əmsallar cədvəlində 100,803 əmsalla İngiltərə başçılıq edir. İspaniya (86,614) 2-ci, İtaliya (84,855) isə 3-cü pillədə qərarlaşıb.

Bu arada “Qarabağ”ın "Braqa"nı adladığına görə nə qədər pul qazandığı da bəlli olub. Ağdam klubu qitə futbol qurumundan daha 1,2 milyon avro alacaq.