Kilian Mbappenin artıq PSJ-ni mövsümün sonunda tərk etmək qərarını rəhbərliyə bildirdiyi hamıya bəllidi. Onun paytaxt klubundan azad agent kimi ayrılacağı da məlumdu.

Sadəcə, bu haqda nə futbolçu, nə də PSJ rəsmi açıqlama verib. Tərəflər mövsümün gedişində bu barədə ictimaiyyətə nəsə danışmağın komandanın hədəflərinə az-çox zərbə vura biləcəyindən çəkinirlər. Deməli, hər şeyə rəsmən bir neçə aydan sonra aydınlıq gələcək. Kilianın daha cəlbedici şərtlərin nəzərdə tutulduğu yeni təklifi qəbul etməməklə Parisi sərbəst futbolçu kimi tərk edəcəyi artıq məlumdu.

Ortaya çıxan əsas sual isə onun harda qərar tutacağıyla bağlıdı. Əslində bu sualın cavabı da bəllidi: o, çoxdan “Real”ın hədəfindədi. DÇ-2018-in çempionu da karyerasını məhz bu klubda davam etdirməyi arzulayır. Problem ondadı ki, İspaniya klubunun təklif etdiyi şərtlər Mbappeni o qədər də qane etmir. Fevralın 7-də futbolçunun madridlilərdən 50 milyon avro illik məvacib və 120 milyon avroluq imza pulu istədiyi haqda xəbər yayılmışdı. Ayın 15-də məşhur insayder Fabritsio Romano səbəbkarın PSJ rəhbərliyinə mövsümün sonunda klubdan ayrılacağını bildirdiyi haqda məlumat vermişdi. Fevralın 17-də isə “Real”ın prezidenti Florentino Peresin komandanın bəzi oyunçularına Kilianın yayda onlara qoşulacağnı dediyi iddia edilib. “A Bola” qəzetində də maraqlı məlumat yayılıb: Portuqaliya nəşri “Mançester Siti”nin Mbappeni ona “Real”la müqayisədə daha cəlbedici təklif irəli sürməklə sıralarına qatmaq üçün cəhdə əl ata biləcəyini yazıb.

Amma artıq bəzi mənbələr fransalı hücumçunun madridlilərlə anlaşdığını iddia edir. Məsələn, “Marca” tərəflərin müddəti 2028/29 mövsümünün sonuna qədər razılaşdırılan müqavilə üzrə anlaşdıqlarını xəbər verib. İspaniyanın ən populyar idman qəzetinin jurnalisti Ramon Alvares de Mun “Kilian Mbappe “Real” ilə müqavilə bağlayıb. Bu, artıq arxada qalan əməliyyatdı. İndi geriyə yol yoxdu” fikri ilə çıxış edib.

İspaniyanın digər populyar idman qəzeti olan “AS” isə Mbappenin “Real”a hansı qiymətə başa gələcəyi haqda məlumat yayıb. Bu mənbəyə inansaq, Madrid klubunun ümumi xərci 500 milyon avroya bərabər olacaq. Bura futbolçunun 5 il müddətində alacağı məvacib və müxtəlif bonuslar daxildi.
Fransa klubunun indidən Kilianın yerinə oyunçu axtarışına başladığı da iddia edilir. Müxtəlif mənbələrdə Rafael Leao (Milan), Markus Reşford (Mançester Yunayted) və Viktor Osimhenin (Napoli) yayda Parisdə peyda ola biləcəyi haqda xəbərlər yayılıb. “La Gazzetta dello Sport” iddia edir ki, klubu Leaonu 100 milyon avroya satmağa hazırdı.