1-ci liqada uğursuzluq zolağından çıxa bilməyən “İrəvan” ciddi problemlə qarşı-qarşıyadı.

Komandanın bir qrup futbolçusunun adı danışılmış oyunda iştirakda hallanır. Qərbi Azərbaycan təmsilçisinin 7 oyunçusu Dövlət Təhlükəsizlik Xidmətinin (DTX) əməkdaşları tərəfindən sorğu-sual edilir. Bunu baş məşqçisi Nazim Süleymanov da etiraf edib:

Söhbət “İrəvan”ın ölkə kubokunun 1/8 finalı çərçivəsində dekabrın 19-da “ASK Arena”da keçirilən “Araz-Naxçıvan”la görüşündən gedir. Süleymanovun komandası həmin qarşılaşmadan ağır yenilgi ilə ayrılmışdı – 2:8. Təbii ki, futbol səhvlər oyunudu. Bir komandanın qol vurması üçün digəri mütləq səhvə yol verməlidi. Futboldan anlayışı olan hər kəs klublar arasındakı səviyyə, təcrübə və keyfiyyət fərqini bilir. Yəni heç kim sırf 8 qol buraxdığına görə “İrəvan” haqda “oyun alqı-satqısı ilə məşğuldu” demir. Burda məsələ fərqlidi. Ardıcıl buraxılan səhvlər, 2 dəqiqəyə 2 qol, hesabı açıb ardından 8 top buraxmaq diqqəti çəkən və şübhə doğuran məqamlardı.

Həmin qalmaqallı matçı yenidən izləmək və epizodları təhlil etmək qərarına gəldim. Oyunun startından son dəqiqəyə qədər meydanda baş verən hadisələri bir-bir incələyib, məsələnin nə dərəcə real olduğunu araşdırmağa çalışdım. Əvvəlcə “İrəvan”ın həmin gün meydanda olan heyətini xatırladım: Andrey Sinenka, Cavid Tağıyev (k), Kamal Mirzəyev, Fəhmin Muradbəyli, Fərid Kərimzadə, Seymur Əliyev, Arsen Ağcabəyov (Elşən Abdullayev, 46), Vüsal Əsgərov, Ramin Məhərrəmov (Balamirzə Soltanov, 77), Vüsal Qənbərov, Ege Atlam Adnan.

Oyun gözlənilən kimi başlamır. Hər kəs “Araz-Naxçıvan”ın matça dominant start verəcəyini düşünsə də, “İrəvan” hamını müsbət mənada təəccübləndirir. Hesabı da məhz meydan sahibləri açır. Vüsal Qənbərov fərdi reydini qolla tamamlayır. Onun hücumu zamanı müdafiədə yalnız Zamiq Əliyev yer alır. Vüsalla duel zamanı (15-ci dəqiqənin 19-20-ci saniyələri) Əliyev topa müdaxilə etmək şansı qazanır, lakin sonra fikrindən daşınır. Bəlkə də özünəinamı itirib, düşüncəsindən vaz keçir. Amma konkret müdaxilə şansını boşa verir. Qənbərovun zərbəsinə Semir Bukviç peşəkar qolkiperə yaraşmayan şəkildə reaksiya verir. Qüvvətli olmayan və üzərinə gələn topu əllərinin arasından buraxır. 24-cü dəqiqədə “Araz-Naxçıvan” Aksel Nqando ilə bərabərlik qolunu vurur. Ona ötürmə verən Bayraməli Qurbanova Seymur Əliyevdən başqa heç kim mane olmağa çalışmır. Hətta yanlış verilən ötürməni Arsen Ağcabəyov bərbad toxunuşla qarşılayıb, Nqandonun önünə atır. Nəticədə hesab bərabərləşir. Heç 2 dəqiqə keçməmiş Orxan Əliyev komandasını hesabda önə çıxarır. Müdafiəçilərin yanından keçib Orxana gələn topa müdaxilə edən olmur. Hətta qolkiperin bir addım artıq ataraq, dueldən qalib ayrılmaq şansı olsa da, Sinenko Əliyevə doğru gəlib, çatmamış dayanır. Əvəzində Orxan onu rahatlıqla geridə qoyur və qolunu vurur. Hissənin ortalarında hesab yenidən bərabərləşir. Seymur Əliyevin cinah asmasında iki futbolçu topa toxuna bilsə də, bunu bacarmırlar. Belədə Vüsal Əsgərov adını tabloya yazdırır. Epizoda diqqətlə baxdıqda “Araz-Naxçıvan”ın qapıçısı Bukviçin topa doğru tullandığı anda əlini geri çəkdiyini görmək mümkündü. Bu inamsızlıqdan irəli gəlir, yoxsa bacarıqsızlıqdan – ona artıq siz qərar verin. Hissənin son 7 dəqiqəsində daha 2 qol vurulur. 42-ci dəqiqədə “İrəvan” müdafiəsində ardıcıl səhvlər baş verir. Müdafiəçilər bir-birinə topu ötürmək əvəzinə yerində durur və onlara dəyən top sanki divardan qayıdırmışcasına qonaqların önünə düşür. Epizodun 10-15 saniyəlik davamında “Araz-Naxçıvan” futbolçuları rəqibin cərimə meydançasında istədiyi kimi gəzir, paslaşır, sonda da qol vurur. Arxa xətt oyunçuları isə sadəcə, topun qarşısına gövdələrini qoymağa çalışırlar ki, onu da bacarmırlar. Yenə çox keçmir, Azər Bağırovun yetirmələri 11 metrlik cərimə zərbəsi vurmaq hüququ qazanır. İlk hissəyə artırılan 3-cü dəqiqədə Arsen Ağcəbəyov heç nədən penaltiyə səbəb olur. İkili mübarizədə deyil, ən yaxın rəqibi ilə arasında 4-5 metr məsafə var. O isə üzərinə gələn topu əli ilə qəbul edir. Halbuki çox rahatlıqla sinəsi və ya dizi ilə saxlayıb, oynaya bilər. Yəqin epizodu təcrübəsizlik kimi də qiymətləndirmək olar. Penalti zamanı isə Nqando qapıçını necə aldadırsa, qolkiper topa toxunuş olmadan əks cinaha tullanır.

İkinci hissə də qolla başlayır. Bu səfər Nqandonun ötürməsini Əliyev başla tamamlayır. Top bəstəboy Orxana gələnə qədər ucaboy iki müdafiəçi, həmçinin qapıçı tullanır, amma onun çatdığı hündürlüyə yüksələ, topa toxuna bilmirlər. Qolkiper, ümumiyyətlə, o epizodda nə etdiyini özü də bilmir. Qonaqların 6-cı qolunda da Sinenko ön plandadı. Deyə bilərsiz ki, 4 futbolçu ilə üz-üzə qalıb. Amma fikir versəz, o, nə topla olan rəqibinin üzərinə çıxır, nə də qapıçı xəttinə paralel dayanır. Nəticədə fərq 4-ə yüksəlir. 7-ci qol, sadəcə, fiaskodu. Seymur Əliyevlə mübarizədən qalib ayrılan Maşike topa yüngülcə toxunur. Qolkiper onun qüvvətli olmayan zərbəyəbənzər toxunuşu qarşısında aciz qalır. Oyunun sonlarında Elvis dubla imza atır. O, künc zərbəsindən gələn ötürmədə topa yüksələn tək futbolçu olur. Yalnız Fəhmin Muradbəyli onunla mübarizə aparmağa çalışır. “Neftçi”nin sabiq oyunçusu isə topa üzü qapısına tərəf tullanır. Bəlkə də topa toxunsa, avtoqol müəllifi belə ola bilər. Lakin onu az da olsa, anlamaq olar. Hücumçudu, işi qol vurmaqdı. Müdafiəyə köməyə gəlib və belə anlarda təcrübəsizdi. Amma Sinenko bu epizodda da topa yarımçıq tullanır. Futboldan anlayışı olanlar bilir ki, qapıçı küncə gedən zərbəyə bir ayağı yerdə tullanmır.

Vurulan qolların hər birinə demək olar ki, azı 5 dəfə baxdım. Hər birini tərəfsiz və qərəzsiz incələdim. Nəticədə məlum olur ki, 10 qolun hamısında aşkar səhvlər qeydə alınıb. Yuxarıda vurğuladığım kimi, bəlkə də bunlar komandanın təcrübəsiz olmasından qaynaqlanır. Amma bir komandanın bir matçda bu qədər ardıcıl səhvlər etməsi ən azı şübhə doğurur. Nəhayət, bizim bir məşhur məsəli də xatırlatmaq istəyirəm: od olmayan yerdən tüstü çıxmaz!

İSMAYIL XEYRULLAYEV