Misli premyer-liqasının 23-cü turunda "Neftçi" "Zirə"ni məğlub edib - 1:0.

"Football-plus.az" xəbər verir ki, matçdan sonra "ağ-qaralar"ın baş məşqçisi Miodraq Bojoviçin mətbuat konfransı keçirilib. Sizi mütəxəssisin fikirləri ilə tanış edirik:

- İlk mətbuat konfransınızda bildirmişdiz ki, komandanın yaxşı nəticələr göstərməsi üçün altı həftə lazımdı. Altı həftə keçib, amma müdafiədə səhvlər, hücumda problemlər davam edir. Bu problemlərin həll olunması üçün nə qədər vaxt lazımdı?
- Çox yaxşı qeyd etdiniz. 28 gün ərzində 7 oyun keçirmişik. Hər dörd gündən bir oynayırıq. Biz bura gələndə, zədəlilərin sayı kifayət qədər idi. Alfa Konte və Brayan Moreno çempionatın başlamasına iki gün qalmış komandaya qoşuldular. Qara Qarayev və Filip Ozobiç oktyabr-noyabrdan oynamırdılar. Eyni zamanda da, komandadakı yaş faktoru öz sözünü deyir. Bu baxımdan, bərpa üçün daha çox vaxt lazımdı. Sabit dövr olmalı idi. Faktiki olaraq, biz bir həftə Türkiyədə, iki həftədi ki, burada çalışırıq. 

- "Neftçi"nin əvəzedici heyəti yaxşı oyun göstərir. Oradan kimlərisə əsas komandaya cəlb etmək fikriniz var?
- Oyunçularımız kifayət qədərdi. Amma əsas komandada zədəli oyunçularımız var. Bizə onlarla keyfiyyətli şəkildə işləmək lazımdı. Məşqlərə oyunçu lazım olanda, əvəzedici heyətdən futbolçu dəvət edirik.

- Sizin üçün prioritet nədi, nəticə, yoxsa yaxşı oyun?
- "Araz-Naxçıvan"a məğlubiyyətdən sonra komandada ab-havanın, əhval-ruhiyyənin və özgüvənin artması baxımından üç xal daha önəmli idi.

- "Zirə"nin vurduğu və ləğv edildiyi qoldan öncə qayda pozuntusu qeydə alındı. Rəqibin baş məşqçi bildirdi ki, orada heç bir fouldan söhbət gedə bilməz. Həmin epizodla bağlı fikriniz necədir, həmkarınızla razısız? 
- O, mənim həmkarımdı. Onun sözlərinə şərh verməyəcəm.

- Rəqib sizdən oyun planında üstün idi. Sizə elə gəlmir ki, "Zirə" hesabı ilk dəqiqələrdə açsaydı, oyunun taleyi başqa cür olacaqdı?
- Nəsə demək çətindi. Yəqin ki, daha çətin keçərdi. Bəxt də faktorlardan biridi. Bu, bilirsiz nəyə oxşayır? Baba nənə olsaydı, necə olardı?

- Bu gün "Neftçi"nin bəxti gətirdi, "Zirə"nin bəxti gətirmədi?
- Hər ikisi.

- Əsas rəqiblərinizdən olan "Qarabağ" bu həftə Avropa Liqasının pley-off mərhələsində "Braqa"nı məğlub etdi. Onların qələbəsini necə dəyərləndirirsiz?
- Mən çox sevinirəm. Çünki "Qarabağ" Azərbaycan futbolunun klubudu. Avropadakı istənilən qələbə Azərbaycandakı futbolun səviyyəsini yüksəldi. Azərbaycanda nə qədər işləsəm, avrokuboklarda oynayan bütün klublarınıza azarkeşlik edəcəm. Əlbəttə ki, "Qarabağ" - "Neftçi" oyunlarında özümüzə azarkeşlik edəcəm.