"Muradın Rusiyada çalışdırdığı komanda ən yaxşılardan biri idi, burda elə deyil"
Misli premyer-liqasının 19-cu turunda "Neftçi" "Sabah"la heç-heçə edib - 0:0.
"Football-plus.az" xəbər verir ki, matçdan sonra "ağ-qaralar"ın çalışdırıcısı Miodraq Bojoviçin mətbuat konfransı keçirilib. Sizi onun fikirləri ilə tanış edirik:
"İlk növbədə Azərbaycan xalqına 34 ildən əvvəl baş verən hadisələrlə bağlı başsağlığı verirəm. Oyuna gəlincə, məncə, biz pis oynamadıq. Matça yaxşı başladıq, ilk yarıda qol vurmaq üçün imkanlarımız var idi. “Sabah”da da qol epizodları yara bilmişdi. İkinci yarı da dinamik və maraqlı keçdi. Hər iki komandanın qol imkanı var idi. Məncə, bərabərlik ən ədalətli nəticə oldu".
- Əlinizdəki material hədəfə çatmaq üçün yetərlidi?
- Biz iki yeni oyunçu ilə müqavilə imzalamışıq. Onlar bizimlədi. Heyətdə 2 zədəlimiz var. İndiki heyətdə olan oyunçular yetərli olacaq.
- Deyirdiz ki, fiziki hazırlıq sarıdan problemlər var. Bu problemi aradan qaldıra bildiz?
- Bu, elə də asan həll olunan məsələ deyil. Daha çox vaxt lazım olacaq. Amma komanda ən azından mübariz şəkildə irəliləsə, əvvəlkindən daha yaxşı olacaq. Bu gün meydanda biganə qalan hansısa oyunçunu görmədim. Nəticə onlar üçün önəmli idi.
- Hücumda bitiriciliyi olan forvard hələ də çatışmır. Yeni transferiniz Brayan Moreno da bir müddətdi zədəlidi. Yeni hücumçu gələcək?
- Moreno sağ-salamatdı. Ümid edirik ki, tez bir zamanda oynamağa başlayacaq.
- Murad Musayevlə Rusiyada bir neçə dəfə fərqli komandaların baş məşqçisi kimi qarşılaşmısız və heç birində qalib gələ bilməmisiz. Bu gün də qələbə qazanmaq mümkün olmadı...
- Muradın Rusiyada çalışdırdığı komanda ən yaxşılardan biri idi. Burda elə deyil. Əlbəttə ki, zarafat edirəm. Murad Musayevə hörmətim var, çox gözəl məşqçidi.
- Matçdan sonra Ayaz Quliyevlə nə haqda danışdınız?
- "Arsenal"da bir il mənimlə çalışıb. Onunla münasibətimiz yaxşıdı. Salamlaşdıq, bir-birimizi təbrik etdik.
Digər xəbərlər
