Bu mövsüm gözəl bir çempionluq mübarizəsinə səhnə olan Türkiyə çempionatında ötən həftəsonu mühüm olay yaşandı.

10 illik çempionluq həsrətinə son qoymaqda qərarlı olan “Fənərbaxça” evdə “Alanyaspor”u yenə bilməməklə qızıla bərabər 2 xal itirdi. Bununla da “Qalatasaray” vahid liderə çevrildi. Son illərdə mövsümün həlledici məqamında itirilən xallar “Fənər”ə baha başa gəlib. Elə bu mövsüm də görünən odu ki, komanda bu sindromdan əziyyət çəkir. Ev oyunları çempionluq yolunda mühüm əhəmiyyət daşıyır. “Qalatasaray” evdə 10 aya yaxındı xal itirmədiyi təqdirdə, “Fənərbaxça” bu mövsüm 11 xalın 9-nu evdə itirib.

Bəs “Alanyaspor”la görüşdəki xal itkisinin və liderliyin əldən verilməsinin əsas səbəbləri nədi?

Camiədə və fanatlar arasında İsmayıl Kartala yönələn əsas narazılıqlara diqqət yetirək. Birinci məqam heyət seçimi zamanı ədalətsizliyə yol verilməsidi. Kartal üçün kimin yaxşı formada olmasının və ya məşqlərdə özünü yaxşı tərəfdən göstərməsinin fərqi yoxdu. Bu məşqçinin şablon “11-liy”i var və dünya dağılsa da, ondan vaz keçmir. Məsələn, qapıçı İrfan Can Eğribayat və Mişi Batşuayi bu mövsüm şans qazandıqları oyunlarda kifayət qədər yaxşı performans sərgiləyiblər. Eğribayat ən son kubokda Antep səfərində çox kritik bir penaltini dəf etmiş, elə həmin oyunda da Batşuayinin dublu komandaya qələbə qazandırmışdı. Amma nə fayda? “Alanyaspor”la matçda yenə qapıda Livakoviç yerini aldı. Batşuayi də ehtiyatda qaldı. 6,6 milyon avroya alınan Livakoviçin hələ də Türkiyə futboluna uyğunlaşa bilmədiyini söyləyə bilərik. O, bu mövsüm cərimə meydançası xaricindən ən çox qol buraxan qapıçıdı! Rəhbərlik bu problemi həll etmək və əlcək sahibinin performansını artırmaq üçün məşqçilər korpusuna xorvatiyalı bir qapıçılar üzrə məşqçi cəlb edəcək. Kartala yönələn ikinci narazılıq planlaşdırmanın düzgün qurulmamasıdı. Krespo, Linkoln və Əmrə Mor kimi futbolçular bu qış komandanı tərk etdi. Görəsən, Kentin onlardan nəyi artıqdı? Son 12 turda meydana çıxmayan və qışda “Latsio”ya yolanmaqdan son anda imtina edən ingiltərəli vinger “Alanyaspor”la qarşılaşmanın 85-ci dəqiqəsində qol ümidi (!) kimi meydana buraxıldı. Özü də Cekonun (!) əvəzinə. Ən qəribəsi odu ki, “pəncərə bağlanandan” sonra federasiyaya göndərilən yeni iştirak ərizəsinə Kentin adı salınmayıb! Yəni bu futbolçu mövsümün qalan hissəsində superliqa matçlarında meydana çıxa bilməyəcək. Digər məqam oyunçu dəyişikliklərindəki yanlışlıqlar və B planının olmamasıdı. Oyun praktikasının azlığından əziyyət çəkən Kruniç “Milan”dan gəldiyi gündən bəri komandaya heç bir fayda verməyib. Son matçda onu 90 dəqiqə meydanda saxlayıb, sürpriz qollar vura bilən İsmayıl Yüksəki əvəzləmək açıq-aşkar yanlış qərar idi. Bundan başqa, Kartalın artıq klassikləşən Cengiz Ündər – İrfan Can Kahveci dəyişikliyindən və ikinci hissələrdə Batşuayini meydana buraxıb iki hücumçulu taktikaya keçməsindən başqa heç bir addımı gözə dəymir. Rəqiblər artıq bu məşqçinin oyunun gedişində nələr edəcəyini əzbər bilir. Ona “Anadolu məşqçisi” deyənlər ilk növbədə məhz B planının olmamasına işarə vurur. Daha bir sual doğuran məqam “Alanyaspor”la matçın 85-ci dəqiqəsində Cekonun oyundan çıxarılması oldu. Komandaya qolun hava-su kimi lazım olduğu anlarda qol silahını əvəzləmək hansı məntiqə sığır? Bu dəyişikliyin mənasını Kartalın özündən başqa heç kim anlamadı.

“Qalatasaray”lıların komandanın liderliyə yüksəlməsini böyük coşqu ilə qeyd etməsi əbəs deyil. Çünki qan iyi hiss edən köpək balığına bənzyən “Cim-Bom” mövsümün bu hissəsində lider olandan sonra zirvəni əldən verməyi xoşlamır. Elə statistika da məhz bunu deyir. İstanbul nəhəngi indiyə qədər Türkiyə çempionatında 20 mövsümdə sona 13 tur qalmış lider olub. Komanda bunların 16-da sonda çempionluğu bayram edib! Qalan 4 mövsümün 3-ü 2-ci pillədə, 1-i isə 3-cü pillədə başa vurulub.