"Ölkədə 1350 mağazamız, 8500 əməkdaşımız var. Qərar vermişik ki, “OBA” marketlər şəbəkəsi olaraq, unudulmuş məhlə futbolu ilə bağlı bütün ölkəni əhatə edən geniş bir layihə həyata keçirək. Bu yöndə futbol klublarından və Futbolun İnkişaf Fondundan dəstək istədik. FİF-də bizə dedilər ki “Zaqatala” futbol klubuna dəstək verə bilərsizmi? Açığı, bu təklifi o qədər də xoş qarşılamadıq. Düşünürük ki, biz “Zaqatala”ya sponsor olsaq, başqa bölgələr bizdən inciyər. Axı “OBA” marketlər şəbəkəsi bütün ölkəni əhatə edir. Bu müzakirələrin davamı kimi "Zaqatala" ilə bağlı yanvarın 20-də keçirilən tədbirdə mən də iştirak etdim, fikirlərimi bildirdim. Məncə, belə sponsorluq danışıqları yanvarda yox, oktyabr və noyabrda getsə, daha yaxşı olar. Çünki hər bir böyük şirkət növbəti il üçün büdcəsini məhz başa çatmaqda olan ilin sonlarında müzakirəyə çıxarır, təsdiqləyir, hansı istiqamətlər üzrə pul xərcləyəcəyini müəyyənləşdirir. Tutaq ki, bizim korporativ sosial məsuliyyət büdcəmiz illik 100 min manatdısa, bunun 72 min manatını "Zaqatala"ya ayıra bilmərik. Hələ ki "Zaqatala"ya “hə deməmişik”. Bu yöndə danışıqlar davam edir. Qeyd etdiyim kimi, biz daha çox məhlə futbolu ilə bağlı layihəni gerçəkləşdirmək niyyətindəyik".