"Oyunla bağlı danışacaq çox şey yoxdu. Futbolçularımı təbrik edirəm. Əla oynadılar. “Sabah”a qarşı oynamaq çox çətindi. Qol epizodlarımız var idi. Top son zamanlar qapıdan keçmək istəmir. Səbirli olub, bunun üzərində işləyib, daha da yaxşılaşdırmaq lazımdı".

"Football-plus.az" xəbər verir ki, bu sözləri "Zirə"nin baş məşqçisi Rəşad Sadıqov Misli premyer-liqasının 20-ci turunda "Sabah"la oyundan sonra keçirilmiş mətbuat konfransında deyib. O, jurnalistlərin suallarını cavablayıb:

- Penalti epizodunu necə şərh edərdiz? “Zirə" uduzdu, yoxsa hakim uduzdurdu?
- Hakim səhvlərinə görə yavaş-yavaş məcbur olub, məşqçidən çox ekspertə çevrilirik. Hər oyundan sonra sanki veriliş gedir, hakim səhvlərini müzakirə edirik. Epizoda baxdım. “Sabah”ın qapısına korner verilməli idi. Yaxşı, tutaq ki, istəmirsən. Heç-heçə hakim üçün ən yaxşı nəticə idi. Ki, daha az narazılıq olsun. Korneri vermirsən. 90+7-ci dəqiqə gedir, heç olmasa, oyunu bitir də. Nəyi gözləyirsən? Niyə bitirmirən? Ona qədər epizodlar çox idi.

- Çox gərginsiz...
- Məyusuq. Amma artıq alışmışam. Təəccüblü bir şey yoxdu. Heç nəyə təəcüblənmirəm. “Qarabağ”la matçda iki qırmızı epizodu çox müzakirə edildi. VAR niyə susdu? Tural Qurbanov bəy niyə bizim oyunlara az gəlir? Az hakimlik edir? Birinci yarıda “Sabah”la matçda qırmızı vərəqə epizodu var idi. O da VAR-dan kömək gəlməli idi? Vladislav Kulaçın epizodunu deyirəm. Azarkeşlər, futbol ictimaiyyəti bilmir ki, “Qarabağ”la matçda iki qırmızı vərəqə epizodunda susan VAR hakimi Rauf Cabbarov idi. Baş hakim görmədi, sən də görmədin? Bu gün isə turun mərkəzi oyununu idarə etdi. Hamımıza psixoloji cəhətdən təsir edir. Oyundan qabaq da bu haqda söhbət etdik. Hakimlikdən çox şey gözləmirdim. “Turan Tovuz”la oyunda Rəhim Sadıxovun qolu... ”Araz Naxçıvan”la matçda isə Rüstəm Əhmədzadənin epizodunda ox işarələri yuxarıda idi. Eldar Quliyevin bu gün qulağı, yoxsa teli qabaqda idi? Hər dəfə deyirəm ki, yəqin bundan o tərəfə nəsə olmayacaq. Amma hər dəfə təəccübləndirirlər. Taleyimə belə yazılıb. Məşqçiliyə ilk başladığım gündən necə gedirsə, belə davam edir. Dəyişən heç nə yoxdu. Konfrans Liqasına düşə bilərik. Olmaz! Bunlar Qurban Qurbanov üçün də var idi. Amma “Qarabağ” indi elə səviyyədədi ki, bunlar yoxdu. Rəşada olmaz. Qurban Qurbanovla Rəşad Sadıqova Azərbaycan futbolunda irəli getmək olmaz. Bunları canlı yaşayırıq da.

- Bəlkə başqa ölkədən hakimlər gətirsinlər..
- Çıxış yolu deyil. Niyə başqa oyunlarda olmur? Ad çəkməyim. “Zirə” nəticə verməməlidi. Hakim səhvi olmasaydı, “Zirə” üç il avrokuboklarda oynayacaqdı. Hakim səhvləri başqa oyunlarda da olsun. Bizim matçlarda xeyrimizə səhv olsun, çıxıb üzrxahlıq edərəm.

- Bəlkə rəhbərlik bununla bağlı aha ciddi şəkildə etiraz bildirsin...
- Belə davam edəcək. 3,5 ildi bilmirik məşqçilik edək, yoxsa bizə qarşı baş verən proseslərdə təmkinli, səbrli olaq. Bu gün oldu, sabah olmaz.

- Sonluğu necə görürsüz?
- Görək də. Allah böyükdü, yaxşı olar.