Bir neçə gün əvvəl Cordan Henderson ilə bağlı iki müxtəlif xəbər yayılmışdı. Onun tezliklə Səudiyyə Ərəbistanından ayrılacağı dəqiq idi.

Tanınmış insayder Canluka Di Martsio təcrübəli futbolçunun İtaliyaya yollanacağını, onun “Yuventus”un hədəfində olduğunu və Turin klubunun ingilis yarımmüdafiəçini mövsümün sonuna qədər icarəyə götürməyi planlaşdırdığını xəbər vermişdi. Lakin Cordanın qarşı tərəfdən 18 aylıq müqavilə tələb etməsi onun İtaliyada qərar tutmasına mane olub.

Səudiyyə Ərəbistanını iqlimini bəyənməyən futbolçunun Avropaya qayıtmaq istədiyi də məlum idi. “Əl-İttifaq”ın heyətində 19 oyun keçirən və 5 məhsuldar ötürmə edən futbolçu artıq “Ayaks”ın sıralarındadı. 33 yaşlı yarımmüdafiəçi əvvəlcə Asiya klubu ilə müqaviləni qarşılıqlı razılıq əsasında pozub. Sonra isə Amsterdam klubunda tibbi müayinədən keçərək rəsmi müqaviləyə qol çəkib. Hendersonun imzaladığı sözləşmənin müddəti 2026-cı ilin yayına qədər nəzərdə tutulub. O, “Ayaks”da “6” nömrəli formanı daşıyacaq.
Xatırladaq ki, Cordon “Əl-İttifaq”a ötən ilin yayında bu komandanın baş məşqçisi olan “Liverpul”un əfsanəvi futbolçusu Stiven Cerrardın istəyi ilə yollanmışdı.