Yanvarın 13-də A seriyasında 20-ci tura start verildi.

Bununla da mövsümün ikinci dövrəsi başladı. Turun ilk iki oyun günündə qeydə alınan nəticələrdən sonra turnir cədvəlinin ilk 3 pilləsində dəyişiklik baş verməyəcəyi məlum oldu. Əsas səbəb “İnter”in ikinci dövrəyə qələbə ilə başlaması ilə bağlıdı.

İlk dövrənin qalibi olan “İnter”in Montsaya səfəri uğurlu alındı. Milanlılar şəhərin eyniadlı komandasını 5:1 hesabı ilə darmadağın etdilər. Matçın nəticəsi praktiki cəhətdən ilk 15 dəqiqədə müəyyənləşdi. Əvvəlcə Çalhanoğlu “İnter”in sabiq oyunçusu Qalyardininin cərimə meydançasında əllə oyununa görə təyin olunan penalti ilə hesabı açdı. Az sonra Lautaro Martines Dimarkonun ötürməsi ilə ikinci qolu vurdu. Ev sahibləri yalnız bundan sonra normal hücumlar təşkil etməyə başladılar. Pessina hətta fərqi minimuma endirdi, lakin VAR-ın müdaxiləsindən sonra qolun qaydalar çərçivəsində vurulmadığı müəyyənləşdi. İkinci hissə də qonaqların oyun planında üstünlüyü ilə başladı. Simone İnzaqinin komandası rəqibin arxa xəttində yol verilən səhvləri bağışlamadı. Çalhanoğlu Türamın daban ötürməsi ilə fərqi üç topa çatdırdı. Türkiyəli yarımmüdafiəçi karyerasında ik dəfə A seriyasında dubl etdi. Hakan bu mövsüm 9-cu qolunu vurmaqla şəxsi rekordunu təkrarladı. Xatırladaq ki, o, 2019/20 mövsümündə “Milan”ın formasında bu qədər qola sevinmişdi. “Montsa” penalti ilə qollardan birinin əvəzini çıxsa da, çempionatın lideri sonda Martines ilə Türamın sayəsində darmadağını rəsmiləşdirdi – 5:1. Lautaro cari mövsümdə 18-ci qolunu vurmaqla bombardirlərin yarışında liderliyini daha da möhkəmləndirdi. “İnter”in çempionatdakı məğlubiyyətsiz seriyasının 14 oyuna (11 qələbə, 3 heç-heçə) çatdığını da bildirək.

Turun mərkəzi oyunu Milanda keçirildi. Eyniadlı komandanın “Roma” ilə oyunda nəyə nail olacağı maraqla gözlənilirdi. Qeyd edək ki, hər iki komanda həftəiçi ölkə kubokunda məğlub olaraq mübarizəni 1/4 finalda dayandırmışdı. Ədalət naminə romalıların çətin səfərə ciddi itkilərlə yollandığını qeyd edək. Ev sahibləri meydan amilindən başqa bundan da məharətlə yararlandılar. Nəticəyə həm də hesabın erkən açılması təsir etdi: Adli Reyndersin ötürməsi ilə bu mövsüm ilk qoluna sevindi. Bundan sonra meydanda barışmaz mübarizə yaşandı. Hissənin sonuna yaxın Ernandesin dirəyi nişan aldığını da qeyd edək.

Joze Mourinyo fasilədə müdafiəçi Mançininin yerinə hücumameyilli Lorentso Pelleqrinini meydana buraxdı. Romalıların hücumu güclənsə də, yenə erkən qol buraxdılar: bu dəfə Kyaerin ötürməsini Jiru dəyərləndirdi. Fransalı hücumçu cari mövsümdə 10-cu qolunu vurdu. Hissənin ortalarında Pelleqrininin qazandığı penaltini Paredes dəqiq yerinə yetirdi. Bundan sonra psixoloji üstünlüyün romalıların tərəfinə keçə biləcəyini ehtimal etmək olardı. Lakin Stefano Pyolinin səliqəli əvəzləmələri matçın taleyini həll etdi: Jiru ilə Ernandesin iştirakıyla yaradılan epizodun sonu müdafiəçinin qolu ilə nəticələndi. Əvvəlki iki turda “Sassuolo” (1:0) və “Empoli” (3:0) üzərində qələbələrdən sonra “Roma”nı da məğlub edən “Milan” 3-cü yerdəki mövqeyini bir qədər də gücləndirdi. Son 5 oyunda 3-cü məğlubiyyətini alan Mourinyonun komandası isə Çempionlar Liqasına vəsiqə verən sonuncu – 4-cü yerdən 5 xal geri düşdü.

Bu yerdə “Fiorentina” qərar tutub. Florensiyalılar ikinci dövrənin ilk matçında evdə “Udineze” ilə 2:2 hesablı “sülh”ə razılaşdılar. Amma onların məğlubiyyətdən son dəqiqələrdə qurtulduqlarını da qeyd edək.

“Roma”dan fərqli, paytaxtın digər təmsilçisi azarkeşlərini qələbələrlə sevindirməyə davam edir. “Latsio” evdə “Leççe”nin müdafiə xəttini yarmaqda çətinlik çəksə də, sonda istəyinə çatdı. Felipe Andersonun yeganə qolu “qartallar”ın ardıcıl 4-cü qələbəsini təmin etdi. Mauritsio Sarrinin komandasını indi “ÇL zonası”ndan yalnız bir xal ayırır.

Mövsümün ilk dövrəsinin kəşfi sayılan “Bolonya” 16-cı turda yüksəldiyi 4-cü yerdə möhkəmlənə bilməmişdi. Tyaqo Mottanın komandası son üç matçda hesabına yalnız 1 xal yaza bilib. “Bolonya” hesabat turunda “Kalyari”yə 1:2 hesabı ilə uduzmaqla enişdə olduğunu göstərdi.

Nəhayət, “Napoli” 3 oyunluq qələbəsizliyə son qoya bildi. Bu oyunlarda yalnız bir xal qazanan son çempion evdə “Salernitana”ya çətinliklə də olsa qalib gəldi. Problemləri başdan aşan cənublular artıq bir müddət aparıcı hücumçusu Osimhensiz oynamalı olacaqlar. Hazırda milli komandanın sıralarında olan nigeriyalı hücumçunun yoxluğunda “Salernitana” üzərində 2:1 hesablı əzmkar qələbəni son dəqiqələrdə müdafiəçi Rrahmaninin qolu təmin etdi. Valter Matsarrinin çalışdırdığı komanda liderdən yenə 20 xal geridədi.

20-ci tur
Montsa – İnter 1:5
Pessina, 68-p. - Çalhanoğlu, 12-p.; 60. Lautaro Martines, 14; 84-p. Türam, 88.
İnter: Zommer, A.Bastoni (Açerbi, 72), De Vrey, Pavar (Bissek, 81), Dimarko (Auqusto, 72), Darmian, Mxitaryan, Çalhanoğlu (Asllani, 62), Barella (Frattezi, 62), Türam, Lautaro Martines.
Napoli – Salernitana 2:1
Politano, 45+4-p. Rrahmani, 90+6 – Kandreva, 29.
Napoli: Qollini, Ruy, Juan Jezus, Rrahmani, Di Lorentso, Lobotka, Kayuste (Demme, 77), Qaetano (Raspadori, 56), Kvaratsxeliya, Politano (Zerbin, 66), Simeone.
Latsio – Leççe 1:0
Felipe Anderson, 58.
Latsio: Provedel, Luka Pelleqrini (Latsari, 65), Qila, Patrik (Romanyoli, 24), Maruşiç, Luis Alberto (Vesino, 65), Rovella, Genduzi, Zakkanyi (İmmobile, 65), İsaksen (Pedro, 46), Felipe Anderson.
Fiorentina – Udineze 2:2
Beltran, 56. Nzola, 87-p. – Lovriç, 10. Toven, 73.
Fiorentina: Terraçano, Biraqi, Lukas Martines, Ranyeri (Milenkoviç, 88), Kayode (Faraoni, 46), Mandraqora, Dunkan (Artur, 46), Brekalo (Nzola, 76), Bonaventura, İkone (Barak, 88), Beltran.
Milan – Roma 3:1
Adli, 11. Jiru, 56. Ernandes, 84 – Paredes, 69-p.
Milan: Menyan, Ernandes (Ximenes, 89), Kyaer, Qabbya, Kalabriya, Reynders, Adli (Zeroli, 89), Loftus Çik, Leao (Okafor, 79), Pulişiç (Musa, 79), Jiru.
Roma: Svilar, Lyorente (Höysen, 78), R.Kristensen, Karsdorp (Çelik, 65), Mançini (Lorentso Pelleqrini, 46), Çelik (Zalevski, 78), Spinatsola, Paredes, Kristante, Əl-Şaaravi (Belotti, 61), Lukaku.
Cenoa – Torino 0:0
Verona – Empoli 2:1
Curiç, 3. Nqonq, 56 – Jurkovski, 64.
Kalyari – Bolonya 2:1
Petanya, 31. Kalafyori, 69-öz qapısına – Orsolini, 24.
Atalanta – Frozinone 5:0
Koopmeyners, 8-p. Ederson, 13. De Ketelare, 14. Zappakosta, 84. Holm, 90.
“Yuventus” – “Sassuolo” oyunu bu gün keçiriləcək.
1. İnter 20 16 3 1 49-10 51
2. Yuventus 19 14 4 1 29-12 46
3. Milan 20 13 3 4 38-21 42
4. Fiorentina 20 10 4 6 29-21 34
5. Latsio 20 10 3 7 24-20 33
6. Atalanta 20 10 3 7 35-21 33
7. Bolonya 20 8 8 4 23-18 32
8. Napoli 20 9 4 7 30-25 31
9. Roma 20 8 5 7 32-24 29
10. Torino 20 7 7 6 18-18 28
11. Montsa 20 6 7 7 20-25 25
12. Cenoa 20 5 7 8 20-24 22
13. Leççe 20 4 9 7 20-26 21
14. Frozinone 20 5 4 11 25-39 19
15. Sassuolo 19 5 4 10 26-33 19
16. Udineze 20 2 12 6 21-32 18
17. Kalyari 20 4 6 10 19-33 18
18. Verona 20 4 5 11 18-27 17
19. Empoli 20 3 4 13 11-35 13
20. Salernitana 20 2 6 12 17-40 12
Bombardirlər: Lautaro Martines (İnter) - 18, Jiru (Milan) – 10, Berardi (Sassuolo), Çalhanoğlu (İnter) - 9.

Oyundan sonra
Valter Matsarri, “Napoli”nin baş məşqçisi: “Fikrimcə, yalnız xarakter göstərmədik, həm də yaxşı oyun sərgilədik. “Salernitana” çox təşkilatlanmış oyun göstərdi, bizim bəxtimiz isə uzun müddət gətirmədi. Futboçularımızın sona qədər mübarizə aparmasına sevinirəm”.
Raffaele Palladino, “Montsa”nın baş məşqçisi: “İnter”in çox güclü oyun göstərməyəcəyinə ümid edirdik. Lakin rəqib meydana çox motivasiyalı çıxdı və ardıcıl iki qol vurdu. Oyuna dönmək şansımız oldu, lakin VAR vurduğumuz qolu hesaba almadı. Əlbəttə, rəqib qələbəyə layiq idi. Bu məğlubiyyət bizim üçün faciə deyil”.

Andrea Belotti, “Roma”nın hücumçusu: “İndiki məqamda ən yaxşı variant birləşmək və işləməkdi. Uzun müddətdi oyunlara hazırlaşmaq üçün yalnız iki-üç gün vaxtımız olurdu. Bundan sonra həm müdafiə, həm də hücum planında yeni nəyisə sınaqdan çıxarmaq üçün 6 günlük imkanımız olacaq. Güclü komanda olduğumuzu düşünürəm. Hər planda keyfiyyətli komandayıq”.