İngiltərə çempionatında ötən ilin dekabr ayının ən yaxşı məşqçisi müəyyənləşib. Bu nominasiyada Unay Emeri qalib gəlib.

“Aston Villa”nın çalışdırıcısı ənənəvi sorğuda Andoni İraola (Bornmut), Devid Moyes (Vest Hem) və Yürgen Kloppu (Liverpul) qabaqlayıb. İspaniyalı mütəxəssisin komandası dekabrda premyer-liqada keçirdiyi oyunlarda “Mançester Siti” (1:0), “Arsenal” (1:0), “Brentford” (2:1), “Bernli”yə (3:2) qalib gəlmiş, “Bornmut” (2:2) və “Şeffild Yunayted” ilə (1:1) heç-heçə etmiş və yalnız “Mançester Yunayted”ə (2:3) uduzmuşdu. “Aston Villa” hazırda 20 oyuna 42 xalla 2-ci yerdədi. Premyer-liqanın lideri isə 45 xala malik “Liverpul”du.

Dekabrın ən yaxşı oyunçusu üçün ayrılan mükafat isə Dominik Solankeyə çatıb. “Bornmut”un hücumçusu çempionatın 6 oyununda 6 qol vurmuşdu. Solanke bu klubun məlum nominasiyada qalib gələn ilk oyunçusu kimi tarixə düşüb.