Misli premyer-liqasının 2023/24 mövsümündə uğursuz nəticələrlə yadda qalan üç komandadan biri “Sabah”dı.

Ötən mövsüm rəqiblərinə “qan udduran” Masazır təmsilçisi gözləntiləri doğrultmur. Halbuki komanda yayda çoxlu bahalı futbolçuyla müqavilə imzalamışdı. Oyunçuların müxtəlif səbəblərdən özünü göstərə bilməməsi bütün ümidləri puç etdi. İndi “tələbələr”in əvvəlki mövqeyinə qayıtması çətindi. Onların lideri Aleksey İsayevin “Qarabağ”a keçidinin durumu daha da qəlizləşdirdiyini bilirsiz. Amma “bayquşlar” təslim olmaq istəmir. Baş məşqçi Murad Musayev ötən mövsümdəki “Sabah”ın olmayacağını etiraf etsə də, masazırlılar mövsümü aşağı pillələrdə başa vurmaq fikrində deyil.

Xəbər verdiyimiz kimi, komanda yanvarın 4-dən etibarən Türkiyənin Antalya şəhərində təlim-məşq toplanışındadı. İki yoxlama oyununun keçirilməsi nəzərdə tutulub ki, birincisini srağagün izlədik. “Sabah” Rumıniya tmsilçisi “Rapid”lə üz-üzə gəldi. Buxarestlilər 16 klubun çıxış etdiyi çempionatın turnir cədvəlində 21 matçdan sonra 33 xalla 4-cü sıradadı. Göründüyü kimi, masazırlıların sınaq üçün Kriştiano Berqodinin yetirmələrini seçməsi təsadüf deyil.
“Sabah” meydana bu “11-lik”lə çıxmışdı: Nicat Mehbalıyev, Maruan Hadudi, Con İrasabal, Boyan Letiç, Elvin Camalov, Adil Quliyev, Anatoli Nuriyev, Vinsent Till, Cesse Sekidika, İshak Belfodil.

Ehtiyatda isə Yusif İmanov, Rüstəm Samiqullin, Sofian Çakla, Xəyal Əliyev, Emmanuel Apeh, Rəhman Daşdəmirov, Davit Dolkov, Amin Seydiyev, Fəxri Məmmədli və Namik Ələskərov var idi.

Maraq üçün qeyd edək ki, Xəyalla Fəxri toplanışa əvəzedici heyətdən cəlb olunub. Oyuna gəlincə, “tələbələr” rəqibini bütün komponentlərdə üstələsə də, səhvsiz oynamadı. “Bayquşlar” təhlükəli qol epizodlarının da müəllifi oldu. Onu da nəzərə alaq ki, Murad Musayev xeyli rotasiya etdi. “Rapid” isə 60-cı dəqiqədə yerinə yetirdiyi penaltiyə qədər ciddi hücum cəhdiylə yadda qalmadı. “Sabah”dan Cesse Sekidika (45+2) və Anatali Nuriyev (68), rəqibdən Burmaz Borisov (60) fərqləndi – 2:1.

Öncə Musayevin oyunla bağlı fikirləri ilə tanış olaq: “Hazırlığın bu mərhələsi üçün keçirilən oyunda keyfiyyət, məzmun və fədakarlıq bizi qane etdi. Hazırlığın ilk həftəsi kifayət qədər yaxşı keçdi. Qarşıdakı günlərdə irəliyə doğru daha bir addım ataraq, inkişafı davam etdirəcəyimizə ümid edirəm. Xeyli yaxşı hücumlarımız oldu. Hər halda, “Rapid” yüksək səviyyədədi. 60-cı dəqiqədə qapımızdan qol buraxdıq. Həmin ana qədər rəqib ciddi təhlükəli vəziyyət yarada bilməmişdi. İndi səhvlərin olması normaldı. Bu, təlim-məşq toplanışıdı, hamı üçün çətindi. Əlbəttə, səhvlərə yol vermək istəməzdik. Əsas odu ki, qələbə qazandıq”.

Onu da bildirək ki, “Sabah”ın növbəti yoldaşlıq oyunu yanvarın 14-də Ukraynanın “Vorskla”sı ilə keçirəcək.

KƏNAN BAHADIR