Premyer-liqada 4 gün sürən, yəni dekabrın 30-da başlayıb, yanvarın 2-də bitən turun nəricəsində “Liverpul” liderliyi qorudu.

"Football-plus.az" xəbər verir ki, “qırmızılar” “Nyukasl”la oyunun hələ ilk yarısında intriqanı bitirməliydi, ancaq qol vəziyyətlərini boşa verdiklərindən “sağsağanlar” 86-cı dəqiqəyə qədər xal ümidini qorudu. “Liverpul”un ən yaxın izləyicisi isə artıq “Aston Villa”dı. Birmingemlilər “Bernli” ilə oyunda son dəqiqələrdəki penalti qolu ilə qələbə qazandı. “Arsenal” isə yenə də uduzdu. Özü də “Vest Hem”ə məğlubiyyətdə təsadüf izləri axtarırdıqsa, “Fulhem”lə oyundakı nəticə qanunauyğundu. Arteta müəyyən nəticələr çıxarmalıdı! Autsayderlərdən “Şeffild Yunayted”i üstələyən “Mançester Siti” artıq 3-cü (itirilməyən xallara görə isə 2-ci) pillədədi.

“Çelsi” “Luton”la oyunun son dəqiqələrində iki top buraxsa da, qələbəni əldən vermədi və 10-cu pilləni qorudu. Belədə ardıcıl 3-cü qələbəsini qazanan “Vulverhempton” “zadəganlar”ı arxada qoya bilmədi. “Tottenhem”ə uduzan “Bornmut”un noyabrın əvvəlindən bəri davam edən məğlubiyyətsiz oyunlar seriyası qırıldı. 5-ci pillədə qalan “mahmızlar” ardıcıl üç qələbənin ardından “Brayton”la heç-heçə edən “Vest Hem” ilə xal fərqini artırdı. “Qağayılar” bu heç-heçə sayəsində turu məğlubiyyətlə başa vuran “Mançester Yunayted”ə çatdılar və hətta topların fərqinə görə ötdülər də. Nəhayət, Olisenin dublu sayəsində “Brentford”u məğlub edən “Kristal Pelas” 8 oyunluq qələbəsiz seriyaya son qoydu. Onu da vurğulayaq ki, bu, premyer-liqadan Afrika və Asiya Kubokuna kütləvi axın ərəfəsində son tur oldu. İki qitə turnirinə yollananlar fonunda premyer-liqada mübarizənin axarının dəyişib-dəyişməyəcəyi maraq doğurur.

20-ci tur
Liverpul – Nyukasl 4:2
Salah, 49; 86-p. Cons, 74. Qakpo, 78 – İsak, 54. Botman, 82. (57421)
Liverpul: Alisson, Qomes, Van Diyk, Konate, Aleksander-Arnold, Soboslai (Qravenberx, 64), Endo (Makallister, 75), Cons, Dias (Jota, 64), Nunyes (Qakpo, 64), Salah.
Mançester Siti – Şeffild Yunayted 2:0
Rodri, 14. Alvares, 61. (55022)
MS: Ederson, Qvardiol, Ake, Akanci, Uoker (Lüis, 68), Kovaçiç (Diaş, 68), Rodri, Qriliş (Bobb, 52), Foden, B.Silva, Alvares.
Nottingem Forest – Mançester Yunayted 2:1
Dominges, 64. Gibbs-Uayt, 82 – Reşford, 78. (29529)
MY: Onana, Dalot, Evans, Varan, Van-Bissaka (Regilon, 90), Maynu (Maktominey, 46), Eriksen, Qarnaço, Fernandeş, Antoni (Dyallo, 54), Reşford.
Tottenhem – Bornmut 3:1
Sarr, 9. Son Hın Min, 72. Rişarlison, 80 – Skott, 84. (61780)
Tottenhem: Vikario, Udoci, Devis, Emerson, Porro, Sarr (Skipp, 32), Bentankur (Heybyerq, 59), Son Hın Min, Lo Çelso (Dayer, 82), Conson (Xil, 82), Rişarlison (Velis, 82).
Fulhem – Arsenal 2:1
Ximenes, 29. De Kordova-Rid, 60 – Saka, 5. (24444)
Arsenal: Rayya, Kivyor (Tomiyasu, 46), Qabriel, Saliba, Uayt (Jezus, 68), Edeqor, Rays, Haverts (Nelson, 78), Martinelli (Trossar, 68), Nketia, Saka.
Luton – Çelsi 2:3
Barkli, 80. Adebayo, 86 – Palmer, 12; 70. Madueke, 37. (11500)
Çelsi: Petroviç, Koluill, Silva, Disasi, Hüsto, Qallaher, Kaysedo, Madueke (Fernandes, 80), Cekson, Palmer (Gilkrist, 90+1), Broya (Nkunku, 62).
Aston Villa – Bernli 3:2
Beyli, 28. Diabi, 42. Luis, 89-p. – Amduni, 30. Foster, 72. (41613)
Vulverhempton – Eveton 3:0
Kilmen, 25. Kunya, 53. Douson, 61. (31639)
Kristal Pelas – Brentford 3:1
Olise, 14; 58. Eze, 39 – Lüis-Potter, 2. (25472)
Vest Hem – Brayton 0:0
(62462)
1. Liverpul 20 13 6 1 43-18 45
2. Aston Villa 20 13 3 4 43-27 42
3. Mançester S. 19 12 4 3 45-21 40
4. Arsenal 20 12 4 4 37-20 40
5. Tottenhem 20 12 3 5 42-29 39
6. Vest Hem 20 10 4 6 33-30 34
7. Brayton 20 8 7 5 38-33 31
8. Mançester Y. 20 10 1 9 22-27 31
9. Nyukasl 20 9 2 9 39-29 29
10. Çelsi 20 8 4 8 34-31 28
11. Vulverhempton 20 8 4 8 30-31 28
12. Bornmut 19 7 4 8 28-35 25
13. Fulhem 20 7 3 10 28-35 24
14. Kristal Pelas 20 5 6 9 22-29 21
15. Nottingem F. 20 5 5 10 24-35 20
16. Brentford 19 5 4 10 26-31 19
17. Everton (-10) 20 8 2 10 24-28 16
18. Luton 19 4 3 12 23-37 15
19. Bernli 20 3 2 15 20-41 11
20. Şeffild Y. 20 2 3 15 15-49 9
Bombardirlər: Holann (MS), Salah (Liverpul) – 14, Solanke (Bornmut) - 13, Son Hın Min (Tottenhem) - 12, Bouen (Vest Hem) – 11.
Növbəti turun oyunları yanvarın 13-21-i aralığında keçiriləcək: Çelsi – Fulhem, Nyukasl – Mançester Siti, Everton – Aston Villa, Mançester Yunayted – Tottenhem, Bernli – Luton, Arsenal – Kristal Pelas, Brentford – Nottingem Forest, Şeffild Yunayted – Vest Hem, Bornmut – Liverpul, Brayton – Vulverhempton.

Turun rəqəmi
632 – “Brayton”un 37 yaşlı yarımmüdafiəçisi Ceyms Milner premyer-liqada oyun sayını bu həddə çatdırdı. O, bu göstəricidi Giqqzi haqladı. Premyer-liqada oyun sayına görə rekordçu isə Qaret Berridi (653). 2002-ci ildən premyer-liqada oynayan Milner “Brayton”a qədər “Lids”, “Suindon”, “Nyukasl”, “Aston Villa”, MS və “Liverpul”un da şərəfini qoruyub.

Turun ulduzu
Məhəmməd Salah (Liverpul) – “Nyukasl”ın qapısına vurulan bütün qollarda iştirak etdi. Dubl etdi, qol və qolu başladan hücumun ötürməsini verdi. Qakpoya ötürməsi, ümumiyyətlə, oyunun bəzəyi idi. Hətta 22-ci dəqiqədə boşa verdiyi penalti də misirlinin parlaq oyunu ilə bağlı təəssürata xələl gətirmədi.

Turun sitatı
Pirs Morqan, ingiltərəli teleaparıcı: “Arsenal”dan növbəti qorxunc oyun. “Aston Villa”, “Vest Hem” və “Fulhem”ə üç həftə ərzində uduzandan sonra premyer-liqada çempionluğa ümid etməyə dəyməz. Bizim üçün hər şey 2024 gələnə kimi bitdi. Təəssüf ki, oyunçularımızın son üç həftədəki mentallığına görə çempionatı qazana bilməyəcəyimiz aydın oldu”.

Faktlar
* 2023-də müxtəlif turnirlər çərçivəsində evdə 28 oyun keçirən MS bunların heç birində uduzmayıb. Qvardiolanın komandasının sonuncu ev məğlubiyyəti 2022-ci il noyabrın 12-də qeydə alınıb (Brenftord – 1:2).
* “Aston Villa” 2023-də “böyük altılığ”a daxil olmayan komandalar arasında hamıdan çox qələbə qazanıb. “Bernli” üzərindəki qələbə ötən il üçün premyer-liqada 26-cı idi. Yalnız MS 2023-də qələbə sayına (29) görə Emerinin komandasını qabaqlayır. Amma “Villa” ötən il premyer-liqada hamıdan çox (17) ev qələbəsi qazanıb və evdə hamıdan çox (53) xal toplayıb.
* Salah ötən mövsümün əvvəlindən bəri 10 penaltidən 4-nü boşa verib. Premyer-liqada qol sayını 151-ə çatdıran misirli “Liverpul”un heyətində bunu bacaran 5-ci futbolçu oldu. Onu Rocer Hant (244), Qordon Hocson (233), İan Raş (229) və Billi Lidder (215) qabaqlayır. Salah həmçinin premyer-liqada bir komandanın heyətində 150 və daha artıq qol vuran 5-ci futbolçudu. Ona qədər Harri Keyn (Tottenhem), Serxio Aquero (MS), Ueyn Runi (MY) və Tyerri Anri (Arsenal) bunu bacarıb.
* “Nyukasl”ın “Liverpul”a qarşı qələbəsiz oyunlar seriyası 15-ə çatdı. “Sağsağanlar” bu rəqibi sonuncu dəfə 2015-in dekabrında məğlub edib.

Oyundan sonra
Mikel Arteta, “Arsenal”ın baş məşqçisi: “Çox ağır, kədərli gündü. Üç gün əvvəl (“Vest Hem” ilə oyunu nəzərdə tutur – red.) udmalı olduğumuz oyunda uduzduq, bu gün isə cari mövsümdəki ən pis oyunumuzu keçirdik. Nə düşüncə, nə sürət, nə də kəskinlik var idi. Topla yaxşı davranmadıq. Qələbəyə layiq deyildik. Əvvəlki 19 turdakı kimi oynamağa davam etsək, mövsümün sonunda zirvədə olacağıq. Ancaq bugünkü kimi oynasaq, zirvəyə heç yaxın da düşməyəcəyik”.