Xəbər verdiyimiz kimi, dekabrın 29-da Səudiyyə Ərəbistanının paytaxtı Ər-Riyadda keçirilməli olan “Qalatasaray”la “Fənərbaxça” arasındakı Superkubok oyunu baş tutmadı.

Son günlər bununla bağlı ən müxtəlif versiylara dolaşır. Elə həmin gün “Football-plus.az” da bu məsələyə toxunmuşdu. Amma əlbəttə, diqqətdən kənarda qalan məqamlar da var.

Əslində ərəb-türk savaşı ilə bağlı incə məqamlar çoxdu. Söhbət ondan gedir ki, ərəblər xilafəti onların əlindən alan türkləri qəlbinin dərinliyində heç vaxt bağışlamadı. Bildiyiniz kimi, xilafətin varlığına Hülakilər son qoyub. İslam xəlifəliyi də sonradan Osmanlı sultanlarına keçib. İkinci əsas səbəb Səudiyyə Ərəbistanının əmirinin Osmanlıya qarşı qaldırdığı üsyanın amansızcasına yatırılmasıdı. Bu hadisə 1808-39-cu illərdə hakimiyyətdə olan 30-cu Osmanlı sultanı 2-ci Mahmudun vaxtında olub. 2-ci Mahmud Səudiyyə Ərəbistanının 4-cü və sonuncu əmiri Abdulla ibn Suudu edam etdirib. 1818-ci ilin dekabrında Ayasofya məbədinin əsas qapısının önündə sonra başı kəsilən əmirin cəsədi üç gün camaata nümayiş olunandan sonra dənizə atılıb. Bununla da Səudiyyə Ərəbistanının 1-ci dövlətinin varlığına son qoyulub. Bundan başqa, Türkiyədə Atatürkə münasibətin şəxsiyyətə pərəstiş səviyyəsində olması da ərəbləri razı salmır. Səudiyyə ərəbləri vəhabi olduqlarından belə şeyləri anlamır, qəbul etmirlər. Onlar üçün bir prinsip var: insan öldüsə, bitdi, mərhumu yada alan heç bir əlamət və nişanə olmamalıdı.

Son illər Türkiyə ilə Səudiyyə Ərəbistanı arasındakı münasibətlər hər nə qədər yaxşılaşsa da, göründüyü kimi, ziddiyyət nöqtələri, tarixin unudulmayan səhifələri də çoxdu. Yəni TFF belə önəmli oyunu Ər-Riyada salmaqla lap əvvəldən səhv etmişdi.

Bir qədər də aydınlatmağa çalışaq: heç bir pul tarixin yaralarını silmir!

ORXAN