Türkiyənin üç nəhəngindən biri sayılan “Beşiktaş”da başverənlər gündəm olmaqda davam edir.

"Football-plus.az" xəbər verir ki, məlum olduğu kimi, ən son Rza Çalımbay da istefaya göndərildi. Komanda son turda “Hatayspor”la səfər oyununa Sərdar Topraktəpə ilə çıxdı və 2:1-lik qələbə qazandı. “Qartal” tarixində ilk dəfə bir mövsümün gedişində 4 fərqli məşqçinin başçılığı altında meydana çıxmış oldu! Yeni məşqçi axtarışının davam etdiyini nəzərə alsaq, bu sayın artacağı dəqiqdi. Yeri gəlmişkən, onu da bildirək ki, ciddi zədə alaraq 4 aylığa sıradan çıxan ingiltərəli yarımmüdafiəçi Aleks Oksleyd-Çemberleynin müqaviləsi ikinci dövrə üçün dondurulacaq.

Bu arada Çalımbay srağagün “Radyospor”a yeni açıqlamalar verib. Onun “ağ-qaralar” haqda danışmaq istəməməsi diqqəti çəkib: “Mən artıq “Beşiktaş”la bağlı danışmaq istəmirəm. Çox qısa müddət klubda oldum. Heç bir məşqçi belə qısa müddətə gəlməyə razı olmazdı. “Beşiktaş” mənə doğma olduğu və onlara söz verdiyim üçün bunu etdim. Oldu və bitdi. Mən də ayrıldım, vəssalam. Dişim ağrıdığı üçün “Hatayspor”la oyunu izləyə bilmədim. İstərdim ki, “Beşiktaş”la bağlı mövzulara toxunmayaq. Çünki sözlərim kluba da, özümə də ziyan vura bilər. Bir şeyi süni gündəmə çevirmək lazım deyil. Mən artıq ordan ayrılmışam. Bacarırlarsa, ora 2-3 həftəlik məşqçi gətirsinlər, mən də görüm. Edə bilməzlər. Mən bunu kluba olan sevgimə görə etdim. İnsanlar isə başa düşmək istəmir. Bu mövsüm başqa klub çalışdıracammı? Əlbəttə. Zatən “Beşiktaş”dan öncə mənə 5-6 yerdən təklif gəlmişdi. Əksinə, indi çox hirsli və istəkliyəm. Yenidən özümü sübut etməyə çalışacam. Yaxşı təklif olsa, qəbul edəcəm. Azərbaycan yığması? “Beşiktaş”dan yenicə ayrılmışam. Hələ ortada ciddi bir şey yoxdu. Bir qədər gözləmək lazımdı. Superliqada mövsümün axarı iki-üç yerə bölünəcək. İkinci dövrədə həm elitada qalmağa oynayanlar, həm də orta sıraladakılar bəlli olacaq. “Qalatasaray”la “Fənərbaxça”nın mübarizəsi isə sona qədər davam edəcək. İkisi də çox inamlı təsir bağışlayır. Superkubokda kimin üstün oynayacağını söyləmək çətindi. Sadəcə, belə bir oyunun ölkədən kənarda keçirilməsi çox qəribədi. Çünki həm “Fənər”lilər, həm də “Qalatasaray”lılar sevimlilərini izləmək istəyirdi. Amma oyun başqa ölkədə olacaq. Çox güman, federasiya həm ölkə futbolunun, həm də bu klubların mənafeyini düşünərək belə qərar verib. Fərqli bir derbi izləyəcəyik. Superliqadakı derbini izlədim. İkisi də qalib gəlmək istəyirdi. Amma bir-birinə fürsət vermədilər. Çünki bir-birini yaxşı təhlil etmişdilər. Əsl derbi ab-havasında keçən bir oyun oldu. “Beşiktaş”dan incimişəmmi? Camiədən yox, amma ordakı ayrı-ayrı şəxslərdən incimişəm. Başqa cür ola bilməz. Zatən ayrılarkən də fanatlara və oyunçulara təşəkkür etdim”.