Xankəndidə keçirilən “Qarabağ” – MOİK oyununu izləyənlər arasında Milli Məclisin üzvü, futbol azarkeşi Aqil Abbas da var idi.

O da təəssüratını “Football-plus.az” saytı ilə bölüşdü: "Orda olmaq möhtəşəm hiss idi. Sevincimdən qarşıma çıxan əsgərləri öpür, qucaqlayırdım. Hər kəsin üzü gülür, bir-birini təbrik edirdi. Çox qürur duydum. Həyatım boyunca bu qədər həyəcanlı olmamışdım. Keçirdiyim hissləri sözlə ifadə etməkdə çətinlik çəkirəm".

Aqil bəy əvvəllər də bu stadionda oyunları izlədiyini bildirdi:

"Stadion qısa müddətdə çox gözəl təmir olunub. Oyun maraqlı keçdi. "Qarabağ" azarkeşi olsam da, Prezidentin dediyi kimi qalib yalnız Azərbaycan xalqı idi. Daha öncə də o stadionda olmuşam. O vaxtlar stadion indiki qədər gözəl deyildi. "Şəfəq" oyunlarını orda keçirən vaxt 4-5 min azərbaycanlı azarkeş gəlirdi. Ermənilər qorxusundan stadiona girə bilmirdi".

Millət vəkilinin fikrincə, hər şey çox gözəl təşkil olunmuşdu: "Təkcə Bakıdan yox, başqa digər rayonlardan da gələnlər var idi. Hər birini yüksək səviyyəli avtobuslarda stadiona gətirib, oyun bitəndən sonra da eyni şəkildə geri qaytardılar. Hər şey möhtəşəm idi. Hər kəs çox razı qaldı. Qarşılaşmadan bir gün əvvəl komanda ilə birlikdə Şuşanı gəzib, daha sonra oyunu izləməyə Xankəndinə gəldik. Hava soyuq idi, üşüsəm belə, buna dəyərdi. İşğal edilmiş torpaqlarımızı azad edəcəyimizə, əvvəl-axır zəfərin bizim olacağına inanırdım. Bütün yazılarımda, povest və romanlarımda xalqı qələbə ruhunda saxlayırdım. Yuxuda belə görə bilmədiyimiz şeylər Ali Baş Komandanın sayəsində həyata keçdi. Bir daha Allahdan şəhidlərimizə rəhmət, qazilərimizə şəfa diləyirəm".

GÜNAY SÜLEYMANOVA