“İlk növbədə AFFA-ya bu məsələ ilə bağlı daha diqqətli araşdırma apardığı üçün təşəkkür edirəm. Həqiqətən də Azərbaycan futbolunun inkişafına çox pis təsir edən haldı. Araşdırmaq, kimlər bu işlərlə məşğul olursa, onları uzaqlaşdırmaq lazımdı. Belə məsələlər görəndə həqiqətən də adam futboldan, bu gözəl və maraqlı idman növündən soyuyur. Əfsuslar olsun, bilmirəm hansı səbəbdənsə yayılan məlumatlarda “Şəfa”nın adını gördüm. Çox təəccübləndim klubun adını bu siyahıda görəndə. Bu mənə çox pis təsir etdi ki, komandamızın adı belə iyrənc məsələdə hallanır. Biz bu məsələni qətiyyətlə çox pis qəbul edirik. İlk növbədə bizim 2-ci liqada çıxış etmək məqsədimizdən biri Azərbaycan futboluna töhfə verməkdi. Heyətimizə nəzər yetirsəz, ən gənc kollektiv bizdədi. Məqsədlərimizdən biri də gənc oyunçular cəlb edib onların perspektivini üzə çıxarmaqdı. Əlavə olaraq bu məqsədlə gənc və təcrübəsi az olan futbolçuları cəlb etmişik ki, onlar bu çempionatda iştirak edərək çox böyük təcrübə qazana bilsinlər.

2-ci liqanın 1-ci dövrəsi yekunlaşıb və heç kim deyə bilməz ki, keçirdiyimiz 14 oyunun hansısa birində alqı-satqı ilə bağlı məqam olub. Hansısa bir epizodda təcrübəsizlikdən və oyun praktikası aşağı olduğuna görə səhvlər ola bilər. Lakin mümkün olan bir şey deyil ki, neqativ hallar olsun. Çünki klubun rəhbəliyi, idarə heyəti bu məsələyə çox diqqətlə nəzarət edir. Belə bir məqam olduğu halda həmin şəxs (oyunçu və sair) dərhal komandadan uzaqlaşdırılardı. Nəticələr isə əlbəttə, bizləri qanə etmir və rəhbərliyi də qane etmir, amma nəsə demək olmur. Çünki biz seçimlərdən gənc oyunçuları cəlb edərək inkşaf etdiririk və praktika qazandırırıq. Əlbəttə, onu da nəzərə almalıyıq ki, istədiyimiz nəticəni onlardan ala bilmərik. Təcrübə, praktika öz sözünü deyir. Komandamızı hələ formalaşdırmağa çalışırıq. Və düşünürəm ki, bizim adımızı bu siyahıda hallandırmaq absurddu. Sonda onu deyə bilərəm ki, hakim haqsızlığı ilə çox rastlaşırıq. Son oyunda da (“Sheki City”- red.) bu hal təkrarlandı. Baş hakimin təcrübəsizliyini bəzi məqamlarda nəzərə alırdıq. Amma rəqibin cərimə meydançasında açıq-aşkar ələ dəyən topa görə penalti vermədi. Əlavə də hakim səhvləri oldu. Hələ cəmi birini deyirəm. Lazım olanda videogörüntüləri göstərə bilərik. Belə olduğu halda komandamız haqsızlıqlarla qarşılaşdığı zaman, əlbəttə, motivasiyadan düşür. Ondan sonra isə tabloda qol rəqəmləri artır”.