Futzal yığmamız bu gün DÇ-2024-ün elit mərhələsinin 6-cı turunda səfərdə Niderlandla qarşılaşacaq.

"Football-plus.az" xəbər verir ki, sonuncu oyunda evdə Rumıniyaya qalib gələ bilməyən (5:5) komandamızın şansı xeyli azalıb. Təmsilçimiz mərhələ adlamaq üçün rəqibini məğlub etməli, daha sonra Rumıniyanın büdrəməsini və D qrupunda hadisələrin lazım olan kimi cərəyan etməsini gözləməlidi. Amma və lakin...

İşlərin yolunda getməsi möcüzəyə bərabərdi. Çünki bu qrupda İtaliya və Sloveniyanın 7 xalı var. Bu gün Sloveniya Çexiya ilə səfərdə, İtaliya İspaniya ilə evdə qarşılaşacaq. Çexiya ilə Sloveniyadan birinin 1 xal qazanması kifayət edir ki, Azərbaycanın Niderland üzərində mümkün səfər qələbəsi heç bir işə yaramasın. Əsas odu ki, ümidlər hələ tam sönməyib, közərir...

Yeri gəlmişkən, millimizin son oyun üçün heyətində dəyişiklik edilib. Baş məşqçi Vitali Borisov Emil Həsənzadəni və Rumıniya ilə görüşdə zədələnən Amadeunu səfərə aparmayacaq. Əvəzində “Neftçi” İK-dan Mirzə Əmirov və karyerasını Belçikanın RSCA klubunda davam etdirən Eduardo Borges milliyə qoşulacaq.

Hazırda yığmamızın heyəti aşağıdakı kimidi: Rövşən Hüseynli (“Atırau”, Qazaxıstan), Emin Kürdov, Xəzər Ağalızadə, Novruz Kazıxanov (hamısı “Araz-Naxçıvan”), Əmir Şocayi, Fərid Atakişiyev, Ülvi Əliyev, Mirzə Əmirov (hamısı “Neftçi” İK), Tofiq Mikayılov, Oktay Rüstəmli, Nihad İsmayılov (hamısı “Baku Fire”), Rafael Vilela ("Andelext", Belçika), Hədi Əhmədi (“Aktobe”, Qazaxıstan), Felipinyo (“Kancil”, İndoneziya), Eduardo Borges (RSCA, Belçika).

Niderlandın heyəti də bəllidi. “Narıncılar”ın baş məşqçisi Miqel Andres Moreno milliyə 15 futzalçı çağırıb: Barri de Vit (“Estrada”, İspaniya), Mika Spiqt (“Marlen”, Niderland), Said Buzambu, Denzel van Houtum, Tevfik Tseyar (hamısı “Eyndhoven”, Niderland), Koen Burq (“De Hommel”, Niderland), Abdessamad Attahiri, Lahsen Buyuzan (hər ikisi “Ovokubo”, Niderland), İliass Bozit , Mohamed Çi, Saber Ben Halu (hamısı “Os Lusitanos”, Niderland), İssam Dahmani (“Real Elmos Herentals”, Belçika), Aimane M'Rabet-Elued, Ayub Tamoux (hər ikisi “Rurmand Tigers”, Niderland), Yordi Orriens (“Ede”, Niderland).

Qeyd edək ki, turun digər görüşündə Rumıniya Qazaxıstanı qəbul edəcək. Həmin oyun saat 21.00-da başlayacaq.

20 dekabr
Niderland – Azərbaycan
Hakimlər: Dominykas Norkus, Mantas Pomeckis, İrmantas Kapraşovas (hamısı Litva)
Timekeeper: Joern Te Kloeze (Niderland)
Almere. “Topsportcentrum Arena”. Saat 21.30.

1. Qazaxıstan 5 5 0 0 15-7 15
2. Niderland 5 2 0 3 11-10 6
3. Rumıniya 5 1 1 3 11-20 4
4. Azərbaycan 5 1 1 3 16-16 4

KƏNAN BAHADIR