“Kəpəz" - "Sumqayıt" oyununda "sarı-göylər"dən Kamran İbrahimov yenə ehtiyatda qaldı. Amma qapıçı oyunboyu kənardan komandasına çılğın şəkildə dəstək verirdi.

"Football-plus.az" olaraq, onunla həm "kimyaçılıar"la oyun, həm də şans qazana bilməməsi ilə bağlı danışdıq.

- Bu gün ehtiyatda olsan da, komandana dəstək verənlərdən idin. Matçla bağlı fikirlərin maraqlıdı...
- Yaxşı mübarizə apardıq. Yaradıcı oyun göstərdik. Təəssüf ki, əlimizə düşən fürsətlərin yalnız birini qola çevirə bildik. Amma ümumi götürəndə rəqiblə açıq futbol oynadıq, çəkinmədik.

- Adil Şükürovun gəlişiylə "Kəpəz"də canlanma var. Müətəxəssis nəyi dəyişdi?
- Hər bir baş məşqçinin fərqli yanaşması, fəlsəfəsi var. Adil müəllimin də özünəməxsus futbol fəlsəfəsi var. Maksimum çalışır ki, futbolçularda özünəinam yaratsın. Biz də onun tapşırıqlarını həm məşqdə, həm də meydanda yerinə yetirməyə çalışırıq.

- Hələ də qapı xəttundə möhkəmlənə bilmirsən. Şans qazanmamağının səbəbi nədi?
- Məşqlərdə var gücümlə çalışıram. Məqsədim daim "Kəpəz"in qapısını qorumaqdı. Üzərimə düşən edirəm. Qalır baş məşqçinin şans verməsi. Adil müəllim nə vaxt mənə güvənsə, “çərçivə”ni layiqincə qorumağa hazıram.

- İki legioner qapıçıyla rəqabət çətin olmur?
- İstər əcnəbi, istər yerli qapıçı olsun - mübarizə aparmalısan. Bu bizim işimizdi.

- Hazırda oyun praktikası sarıdan əziyyət çəkirsən. Düşünmürsən ki, bunu kompensasiya etmək üçün "Kəpəz-2"də oynasan, yaxşı olar?
- Bu haqda düşünürdüm. Hətta məşqçilərimizlə də bunu müzakirə etmişik. Əvəzedicilərimizin son matçında şans qazanacaqdım. Sadəcə, ayağımda bir az ağrılar olduğu üçün "Kəpəz-2"yə qoşulmadım.

- Sonda "Kəpəz" və azarkeşlər üçün nə deyərdin?
- Şükürlər olsun, həm oynumuzda, həm də nəticələrimizdə inkişaf var. Bu tempi bir qədər də artırmalıyıq. Azarkeşlərimizə də “sağ ol” deyirəm. Bütün çətinliklərə, həmçinin ev oyunlarını Tovuzda keçirməyimizə rəğmən, bizi tək qoymurlar. Hətta uzaq səfər qarşılaşmalarında da bizə dəstək üçün gəlirlər. Onların gözləntilərini, arzularını doğruldacağıq.

ABDULLA İSMAYILOĞLU