“Goranboya yaxşı motivasiya ilə getmişdik” – Bərdədən səs gəldi
Birvaxtlar futbolumuzda "ABN-Bərdə" var idi, onun heyətində futboldan doymaq bilməyən Əli Quliyev də çıxış edirdi.
Ta 53 yaşına kimi meydanda top qovdu. Sonra klubun dağıldı, çempionatımıza rəng qatan Bərdə təmsilçisi də tarixə qovuşdu. İndi həmin şəhərdə "Bərdə" adlı yeni komanda təsis olunub. Rayonun veteran futbolçusu Əli Quliyevi də “sükan arxasına” gətirilib. Ötən həftə Region Liqasında debüt edən komandalardan biri də "Bərdə" oldu. Debütant ilk turda səfərdə "Goranboy Qala"nı 2:0 hesabıyla məğlub etdi. Görüşlə bağlı bərdəlilərin baş məşqçisi Əli Quliyevin "Football-plus.az" saytına dedikləri:
"Aydın məsələdi ki, ilk tur həmişə ağır keçir. Camaatımız arasında futbola maraq böyükdü. Goranboya yaxşı motivasiya ilə getmişdik. Amma ilk yarı bizim üçün ağır keçdi. Rəqib bizə çətin anlar yaşatdı. Fasilədən sonra toparlanıb yaxşı oynadıq. Futbolçumuz uzaq məsafədən rəqib qapısına yol tapdı. Növbəti hücumlarımızda hücumçumuza qarşı kobudluğa görə meydan sahiblərinin qapısına penalti təyin edildi və bundan istifadə edərək fərqi artırdıq. Layiqli qələbə qazandıq. Futbolçularımı, bərdəli futbolsevərləri təbrik edirəm. Qarışda "VT Gəncə" ilə ağır səfər oyunumuz var. Artıq həmin görüşə fokuslanmalıyıq".
ABDULLA İSMAYILOĞLU
Digər xəbərlər
